Footer

SARITA:Dungdungnguenkanto Unay Unay (Maudi a paset)

Apaman a nakastrekda iti nalawa nga inaladan, nataldiapandan ni papana a nakatugaw iti swing ken adda bassit a libro a basbasaenna. Nakaputot iti puraw, nakatisiert iti puraw ken nagsapatos met laeng iti puraw a goma. Balay ni manangna daytoy ngem no agpa-Baguio ti amada, ditoy nga aggian.

Dagiti laeng matada nga agassawa ti agsarsarita idi induron ni Noli ti wheel chair. Marikna ni Noli ti tibbayo iti barukongna ket idawdawatna a saanda koma nga agsubang iti amana itoy a gundaway.

“Good morning, p-papa. Happy Family Day…”

“Good morning…” insungbat ti ama ngem di timmaliaw. Nakapigket dagiti matana iti basbasaenna. Kasla awan aniaman kenkuana ti isasangbay dagiti agassawa.

Nagareng-eng ni Adora a nangiyawat iti sangareppet a nalabaga a sabong ti rosas a pinurosna iti hardinna.

Timmaliaw ti ama. Saan a nalawag ti rupana a mangrugin a rugian ti karenken. Nakipinnerreng ti manugang. Nainayad dagiti ima ti ama a nangawat kadagiti sabong sa nagyaman. Inawatna, sinay-opna iti namindua, sa nainayad ti panangidissona iti tugaw.

“Sumrekkayon!” ni manangna a Minda. Nagpakadada nga agassawa. Nupay saan a nagtimek ken di timmaliaw ti ama, nagtungtungtung-ed daytoy.

Iti panangaldaw, dida nakasango a mangan ti ama ta rimmuar daytoy.

MAKALAWAS pay ti palabsen sadanto agpa-Canada. Simmalipda nga agassawa iti cycling fun race ti Cycling Club of Baguio City. Sang-atenda ti Kennon Road manipud iti Saytan, Rosario , La Union agingga iti Burnham Park Lake Drive.

Insakay ni Noli ni Adora iti sango. Impakombertna ti bisikleta tapno umatiddog ken adda pagtugawan ni Adora. Naganaygay a nagpedal. Naragsak met ni Adora a mangitudtudo iti sarsarunuenda a pick-up ti television crew.

“Al-alaandata iti photage, love. ”

“Ung…ung…!”

“Wen, partakak pay! Abutenta ti umuna a grupo!”

“Ung…ung… ” nagngilangil ni Adora, sana pinagtupa dagiti agkakawweng a ramayna, sa idi kuan, nagarte daytoy a kasla napaidda, sa nagungor.

“Wen, aya? Napeggad a sarunuen ti lead pack. No mapasamak ti spill, mairamanta. Namak payen no mapandaganka, Love? Aysus, yad-adayom Apo a Mannakabalin!”

Nagtungtung-ed ni Adora.

Addadan iti Camp 4. Patad. Kellaat a nagmenor iti sangoda ti nangisit a Ford Expedition sa nagsardeng. Naglukat ti ridaw iti sango.

“O, inumenyo, energy drink…!” pormal ti rupa ti bimmaba ken nangitanggaya iti bote.

“Papa…!” nagpreno ni Noli. Dimsaag. Nasileng dagiti kasla batobato a masel kadagiti gurongna ken kadagiti takiagna a mangtengngel iti bisikleta.

“Pagpapigsam, alaemon…” naalumamay ti balikas ti ama.

“Papa, you mean…?”

“ Ala wen, inabaknak. Inabaknak! Anak la ti anak…” immisem ken nagngilangil ti ama.

Narikna ni Noli ti kayab ti nalamiis nga angin. Imbakalna dagiti matana iti bakras dagiti bantay iti daya ket nabuyana a nagkurno dagiti nalayog a kawayan. Immisem.

Manipud iti akinlikud a ridaw ti kotse, bimmaba ni mamana sa timmaray a nangapungol ken ni Adora. “Addakami a mangsuporta kadakayo. We always keep our eyes on you…” kinuna ni mamana.

“Thank you, papa, mama…” nagraed ni Noli a nangawat iti mainum. Nanglukat ken nangitangad. Sinebseban a naminpinsan ti lamiis ti lumlumuag a barukong; lamiis a kas iti aplaw ti angin a nangited iti bang-ar ken nayon a kired. Impainumna amin ken ni Adora ti nabati nga apagkatlo iti botelia. Inisemanna ti panagsala dagiti duyaw a sabong ti marapait a nangkumot kadagiti abaga ti kasla binautan nga uleg a kalsada.

“Sige, rugianyo manen ti agsang-at. Adayo pay ti finish line. Be careful!” indagdag ti ama a nangpekkel iti kanawan nga abaga ti anak kalpasan a kinusona ti tuktok ti manugangna.

“Thank you, papa, mama…mangrugi ita, makaturogkamin iti nairut…”

“Umunakamin ta inkam alaen ni Rochelle. Urayendakayo iti finish line,” kinuna ti ina.

“Agyamankami manen, papa, mama…agannadkayo met iti dalanyo…”

Ganado nga agpedal ni Noli ta agluplupias ti barukongna iti kired ken namnama. Saanen nga agluag ti barukongna. Kasla landok dagiti gurongna a nagpedal.

“Si Apo Chios nan mang sufalit ken chaka isnan fachang ya layad ay inpa-ilam asawam, balok!” impasabat ti maysa kadagiti lima a nakabaag ken uksob a lallakay a nakaiggem iti pika ken gansa idi mabatoganda ti Lion’s Head. Isuda dagiti agpappapiktiur kadagiti turista.

“Idawat-dawatmi nan panang-ited si Apo Chios ya gabay ken dakayo…” kinuna ti maysa pay.

“Iyaman kadakayo em-in amam-a! Adi kabayadan, nan nay manlaplapusanan ay layad yo ken dakami! Maid teken ay mangitauli isnan emin ay layad ya kina agyodyo no di si Apo Chios!” impukkaw ni Noli a nangtaliaw iti likudda. Nagkatawa ta intag-ay ken winagwag dagiti lallakay ti pikada. “Matago-tago tako em-in!” impukkawna manen.

Nagsabat dagiti matada a dua. Manutsutil ti isem ni Adora, a kasna la kunkuna: dinno met a puon ti saleng ti nanglikkabam iti insungbatmo?

Naggarikgik ni Adora ket dinanggayan ni Noli. Naragsakda. Ngem ammo ni Noli, adu pay dagiti agur-uray a pannubok kadakuada, a kas iti panangsang-atda ita iti Kennon Road: nasken nga agridam ken agannad, ta agtinnag ti adu a ling-et (wenno lua pay ket ngata), adu a kired ken anus; nasken ti tured ken pigsa ti pakinakem ken uray maitutop ken rumbeng a pangngeddeng; nasken a di maawanan iti panagtalek iti bagi ken iti Mannakabalin; nasken ti panagannad kadagiti rangkis, kadagiti teppang, kadagiti agtinnag a bato, kadagiti nagalis a disso, kadagiti kurbada, kadagiti masabat ken masaruno a lugan, ken kadagiti agballasiw a tao ken dingo.

“Love, iti kaanoman, diak tallikudan ti sinapataak nga ayat…” nakunana. Naginnisemda nga agassawa…

Comments are closed.