Footer

1 natay, 9 ti nasugatan iti panangsarabo iti baro a tawen

BAGUIO CITY – Maysa ti natay
idinto a 9 a tattao ti biktima ti paputok ken naiwawa a bala iti
pannakasarabo ti tawen 2009.







Lima a tattao ti naireport a
nasugatan iti Ilocos Norte, 2 iti La Union ken lima iti siudad ti
Baguio idinto a maysa ti biktima iti naiwawa a bala.

Natay ni Florencio Que, 62,
taga-Vigan City, gapu iti pannakakubongna ti nauram a pagtagilakuan a
kukuana kalpasan a pinuruakan ti maysa a nabartek a lalaki iti
nakasindi a sigarilio dagiti tagilako a paputok iti tiendana.

Nadetene iti pagbaludan ti
suspetsa, ni Richard Pugal, 21, baro, residente iti Capangpangan,
Vigan City.

Iti Laoag City, lima ti naireport
a nasugatan gapu iti panagpaputokda kas panangsarboda iti baro a
tawen.

Nupay kasta, nagsagrap laeng
dagitoy iti minor a sugat ket saan a kasapulan a nayospitalda,
malaksid ti maysa a nasugatan ti tallo a ramayna.

Iti La Union, naitaray iti ospital
iti San Fernando City ti dua nga ubbing a naputokan ti rebentador.

Segun iti report, bigla a pimmutok
ti iggem da Jericho Villanueva, 10, ken Reymart Gatchalian, agpada a
residente iti Barangay San Eugenio, Aringay, La Union ket nasugatan
ti imada ken dadduma a paset ti bagida.

Naitaray met iti Ilocos Training
and Regional Medical Center, San Fernando City ni Nida de la Cruz,
48, residente iti Barangay Calumbaya, Bauang, La Union kalpasan a
naparsiakan iti bimtak a paputok ti mata ken dadduma a paset ti
bagina.

Iti Baguio City, lima a tattao ti
naireport a nagsagrap iti dunor gapu iti paputok ken luses. Nupay
kasta, saan a grabe ti sugatda ket napagawidda met laeng a sigida.

Nagbalin a biktima ti stray bullet
ni Alfie Caransa, 19, residente iti Barangay Pinget, Baguio City.

Segun iti report, madama ti
panaglualo ti biktima ken dagiti kakabagianna iti balay ti ulitegna
iti Barangay Asin Road idi nadamgisan ti tengngedna iti naiwawa a
bala.

Naitaray ni Caransa iti Baguio
General Hospital para iti pannakaagasna.

Manipud
Disiembre 24, addan 14 dagiti biktima iti paputok iti siudad.#

Comments are closed.