Footer

Mayor, imbilinna pannakaimbestiga pannakabomba ti balay ti hues

BACARRA, Ilocos Norte – Kinondena
ti mayor ditoy ti pannakabomba ti pagtaengan ti maysa a hues ket
kinunana a madi nga ehemplo iti tarigagay iti kappia iti daytoy nga
ili.







Kanaig daytoy, imbilin ni Mayor
Nicomedes de la Cruz ti nainget a panagimbestiga dagiti polis para
iti madagdagus a pannakasolbar ti pannakapabettak ti maysa nga
explosive device iti pagtaengan ni Municipal Trial Circuit Court
Judge Jonathan Asuncion idi Disiembre 29.

Ngem kinuna ni Asuncion a mamati
nga awan iti pakainaigan iti trabahona ti pannakabettak ti maysa a
bomba iti pagtaenganna.

Maysa nga improvised explosive
device ti naipuruak iti garahe ti hues a nanggubuay iti abut a lima a
pulgada ti diametrona ken nakabuongan dagiti sarming dagiti tawa ken
nakadadaelan iti bobeda ken alikamen iti salas.

Nairaman a bimtak dagiti paputok a
naipempen iti garahe nga usaren koma ti pamilia ti hues iti
isasangbay ti baro a tawen.

Kinumpirmaran ti polis a maysa nga
improvised nga explosive device ti naipuruak iti garahe ti hues.

Segun iti inbestigasion ti polis,
maysa a berde a kotse ti mapapati a nagluganan dagiti suspetsa.

Di pay ammo ti kinasiasino dagiti
nagisayangkat iti panagpabettak.

Kinuna ti hues nga ad-adda a
mamati a personal a gura ti motibo iti panagpabettak.

Nupay kasta, nagkedked ti hues a
mangilatak iti kinasiasino dagiti atapenna a nangisayangkat iti
panagpabettak iti pagtaenganna.

Kinuna ti hues a sisasagana a
makitinnulong kadagiti polis para iti nadaras a pannakaammo iti
kinasiasino dagiti suspetsa.

Kinuna ni de la Cruz a saan a
nasayaat nga ehemplo ti napasamak iti imahe ti ilina iti tarigagayna
iti panagtalinaed iti kappia ditoy.#