Footer

SALAYSAY: Aggibus ti Lubong Inton 2012? (Umuna iti dua a paset)

Wen, Virginia, inton Disiembre 12,
2012, iti alas onse iti rabii ti ibagbagada a panaggibus ti lubong.
Daytoy ti nabara a tungtongan dagiti netizen.






Ngimmato kadi dagita kidaymo,
nagarko wenno nagsabatda a kas kaniak, kailian? Wenno immatiddog
dagiti bibigmo a kunam la no subsob ti netib a takong ken kuntodo
baniekes a nakatakder iti sanguanan ti CRT monitor?

Lalo pay a limmibeg ti saritaan
iti isasapit dagiti mammadto ken kadagiti addaan iti nasikap a
panagpampanunot para iti bukodna a pagimbagan.

Iti napalabas, timpuar ti ngiwat
ken dila dagiti nangited iti prediksion a maungaw ti lubong gapu iti
Y2K (tawen 2000) ken iti petsa a 6-6-6 (Hunio 6, 2006) a numero ti
demonio. Ngem di met naungaw ti lubong. Dagiti prediksionda ti
tinungaw.

Sabagay, kinapalso ti kaadduanna,
no di man amin a prediksion ta awan ti pagibasaranda no di laeng
pattapatta. Ngamin, amin a tao ket adda karbenganna nga
agpattapatta. Isuna laeng ta adu dagiti maiyaw-awan ti alipusposda.

Ta apay aya nga ipukpukkawda manen
nga agggibus ti lubong inton Disiembre 12, 2012? Apay a dida la
ketdin maum-uma a mangipukpukkaw wenno mangiwarwaragawag iti
panaggibus ti lubong?

Nangrugi dagiti prediksion iti
panangbasa iti duogan a kalendario ti naungawen a kaputotan, ti
Mayan. Masisirib dagiti Mayan nga astronomo ket mamatida unay iti
garaw dagiti bitbituen, ti init ken ti bulan, dagiti planeta ken amin
nga adda iti kalangitan. Dagitoy ti nangibasaranda iti inaramidda a
kalendario. Naaramid iti pinalanas a bato daytoy dakkel a
kalendarioda. Ditoy a naikitikit dagiti al-aldaw, bulbulan ken
tawtawen babaen kadagiti simbolo wenno drawings. Ti rigatna, napnon
ti bato ket awanen ti pagikitikitanda pay. Agpatingga dagiti
nakitikit iti Disiembre 12, 2012. Kunaen metten dagiti naalikuteg ti
mugingda a gibusen ti lubong!

No adda pay laeng espasio dayta
pagisursuratanda a bato agingga iti Pebrero 2, 2222, aggibus ti
lubong kadayta a petsa? Wenno mapno dayta a kalendario agingga iti
Hunio 6, 6666, agpatingga metten ti lubong dita? Lohika a makuna
koma: naggibus ti kalendario dagiti Mayan, saan? .

Ti agdadata, awan ti imbaga
dagiti Mayan nga aggibus ti lubong kadayta a petsa. Awanen dagiti
Mayan. Saan a ti lubong ti naungaw no di ti kaputotan ti Mayan.

Ngem annugotentayo man wenno saan,
agturongen ti lubong iti paggibusan gapu met laeng iti aramid ti tao
a dina ammo nga ilalaen ti bukodna a taeng – ti mismo a lubong
wenno Mother Earth. Gapu iti global warming, adda masungadan a dakkel
a peggad: posible a marunaw dagiti niebe iti north ken south pole ket
ngumato ti sea level nga agtungpal iti pannakalayus ken pannakaitabon
dagiti nababa nga isla no di man dagiti nasion. Ngem malapdan daytoy
babaen ti itutulong ti tunggal maysa a manglapped ti global warming.

Wen, agturongen iti pannakaungaw
ti lubong gapu iti aramid met laeng ti tao. Gapu iti kinaadun dagiti
chemical residues kadagiti dagdaga, bimmassiten ti maapit idinto ta
nagpaspas ti panagadu ti tao.

Iti daytoy a tawen, napasaran ti
lubong, nangruna dagiti agnaed iti third world countries ti krisis ti
taraon gapu iti isusuyop ti presio ti bagas. Bunga daytoy iti
bimmassit a maapit kadagiti kataltalonan idinto a dumakdakkel iti
kasapulan dagiti nasion a taraon para kadagiti umili.

(Maigibusto)

Comments are closed.