Footer

SARSARITA PARA UBBING: No Apay a Naalsem ti Mangga

IDI un-unana a panawen, nakasamsam-it ti bunga ti mangga. Isu ngamin ti napili ni Sam-it a pagtalinaedan. Narukbos ken nalayog ni Mangga. Kunam la no nabitinan iti riniwriw a balitok no naluomen dagiti bungana lalo no silnagan ti bimmalitok a raya ni Apo Init iti bigbigat. Iti rabii, kunam no kakasla babassit a bituen nga immulog iti daga dagiti duyaw a sabongna lalo no silnagan ti amarillio a lawag ni Apo Bulan. Makaay-ayo, makapaisem a buybuyaen. Isu ti kapipintasan amin nga agtubtubo iti daga.

Itoy a kinagasat ni Mangga, umap-apal dagiti amin nga agtubtubo iti daga nga agbunga iti makan. “Koma, nasam-it met ti bungak…” kunkunada piman.

Gapu iti nalaus a panagapalda kenkuana, nakarikna ni Mangga iti pannakkel. Nagbaliw ti ugalina. Dimmakes ti tabasna. Saan laeng a limmastog ken pimmangas, dinan ammo ti mangaasi ken nagbalin a paidam.

Kas iti napasamak iti maysa nga aldaw…

“Hoy, sika, Tultulaya! Pumanawka iti sirokko!” pabugkaw ti panangibagana, nakabaniekes ti kanigidna idinto ta mangitudtudo ti kanawanna ket kunam la kumilaw ti tadem dagiti matana.

“Nadagaang ‘diay bangkag. Makilinongak kadi apagbiit, apo,” impakaasi ni Tultulaya.

“Ay, diak kayat nga umadawka iti lamiis iti anniniwanko. Pumanawka, panaw! ”

“Kaasiannak kadi met, apo Mangga. Malaylayen dagiti babassit a bungak.”

“Ay, awan asi-asi! Amangan no pati sam-it ti bungak ket takawem! Pumanawkan. No dimo kayat, ampalingenkan, ne!” inaplawan ni Mangga ni Tultulaya babaen kadagiti sangana.

Naikayab ken dandani natulatid ni Tultulaya ta pagattumeng laeng ti katayagna, di unay narukbos ken nalulukneng dagiti sanga, dagiti bulong ken ti puonna.

Agsasaibbek piman a pimmanaw ni Tultulaya. Maasian ngamin kadagiti bungana ta no malaylayda, napaitdanton.

Nasaksian ni Mansanita ti napasamak ta adda laeng daytoy iti sumagmamano a metro iti yan ni Mangga.

“Saankan nga agsangit, Tultulaya, umaykan iti sirokko,” inyawis ni Mansanita.

“Agyamanak unay, Mansanita,” kinuna ni Tultulaya nga agbanbaningrot.

Madamdama pay, nakita ni Mansanita ni Sandia nga agturong ken ni Mangga. Uray la naguyaoy ti dila ni Sandia iti al-alna. Iguyguyodna ngamin iti panagkarayamna dagiti lima a kakasla ulo ti tao a bungana. Nabang-aran ni Sandia a nakadanon iti linong.

“Hoy, hoy, hoy! Sika a Sandia, asino ti nangibaga kenka nga agbasakbasakka iti sirokko?” makapungtot la unay ni Mangga a nagbaniekes. Kasla kumilaw manen dagiti rumrumsik a matana.

“Nadagaang unay idiay bangkag, apo Mangga. Makilinongak kadi a, kaasiannak..”

“Saan a mabalin! Amangan no takawem pay ti sam-itko. Pumanawka, panaw!”

“Kaasiam kadi dagiti bungak. Natamnaydanton no malaylayda.”

“Awan bibiangko kadagita a bungam! Basta pumanawka ita met laeng! Kayatmo a bettakek dagita bungam?” inlayat ni Mangga dagiti sangana.

Aglulua a pimmanaw ni Sandia.

“Umayka ditoyen sirokko ta kaasi dagiti bungam a malaylay, Sandia,” inyawis ni Mansanita.

Arintukiaden ni Sandia.

“Umaykan. Adda ni Tultulaya ditoy sirokko a kaduam.”

“Umaykan gayyem Sandia, nalamiis met ditoy,” inyawis ni Tultulaya.

Ket nakilinong ni Sandia.

Dimteng met ti maysa a Lakay a nagsakay iti bukot ni Sikkubeng a mangguyguyod iti pangga a naglaon iti walo a bariles a suka. Gapu ta nadagaang ti panawen iti dayta nga agmatuon, kinamangdagiti agamo iti sirok ni Mangga.

“Hoy, sika a Lakay, pumanawkayo ken dayta nuangmo! Diak kayat nga aglinongkayo kaniak!” imbaniekes ni Mangga.

“Ungaaa! Nabannogakon nga agguyguyod. Maysan a kilometro ti pinagnak. Dikam’ pay nakagudua iti papananmi. Aginanakami laeng biit ket urayak la agkaling-etanen iti berde,” immuna a simmungbat ti umanal-al a nuang ket uray la nagar-aruyot dagiti labutab iti subsobna.

“Kasta nga agpayso, Mangga. Adayo pay ti papananmi. Palubosannakam’ kadi. Dimo kadi ammo nga awan ti bumusor iti managparabur?”

“A, awan bibiangko kadagita nga ibagbagam, sika a Lakay!”

(Adda tuloyna)

Comments are closed.