Footer

10 pagadalan, immawat iti sag-P6,000 nga insentibo

VIGAN CITY – Immawat iti P6,000
tunggal maysa dagiti sangapulo a pilot school ti Tri-sectoral
Responsibilities Engendering Ecological Sustainability (TREES)
Project manipud iti provincial government iti simple a seremonia a
naangay iti kapitolio idi Enero7.







Inyawat ni Gov. Deogracias Victor
“DV’ Savellano ken ni Dr. Marino Baytec, Ilocos, Sur Schools
Division Superintendent, ti tseke nga aggatad iti P60,000 iti imatang
dagiti pannakabagi ti Refaro Elementary School, Caoayan Central
School, San Ildefonso Central School, San Vicente Central School, Sta
Catalina Central School, Banayoyo Central School, Burgos Central
School, Galimuyod Central School, Nagbukel Central School, ken San
Esteban Central School kas insentibo iti panangsuportada iti nasao a
proyekto

Segun ken ni Environment and
Natural Resources Officer Mario Ruelos, nairugi ti nasao nga proyekto
iti Hulio idi napan a tawen kalpasan a napirmaan ti maysa nga
memorandum of agreement iti nagbaetan ti gobierno probinsial ken
DepEd Ilocos Sur.

Linaon ti nadakamat a MOA a
mapasayaat dagiti school nurseries babaen ti panangguyugoy kadagiti
estudiante aglalo kadagiti adda iti maikalima ken maikanem a tukad ti
elementaria nga agpidut kadagiti bukel ti agbunga ken forest trees a
maiwarwara iti aglawlaw kasukat ti cash incentive nga ipaay ti
gobierno probinsial.

Babaen pay itoy a wagas,
maitandudo ti addang a mangkissay iti basura ken makatulong pay ti
pannakapapintas ti aglawlaw idinto a maipamatmat kadagiti ubbing nga
adda kuarta iti panagitukit iti bukel.

Kinuna
ni Ruelos nga alaen ti ENRO dagiti mapataud a seedlings ket dagitoy
ti maited kadagiti grupo a mangisayangkat iti tree planting ken
dadduma pay a reforestation projects ti probinsia.
#