Footer

BANNER NEWS: Kasapulan, total ban ti paputok iti Heritage Village: bise mayor

VIGAN CITY -Kinuna ti bise mayor
ditoy a kasapulanen a maipatungpal ti selective ban kadagiti paputok
wenno addan areas a maiparit a paglakuan iti paputok tapno malisian
ti kas iti napasamak nga uram ditoy a siudad iti itatapog ti baro a
tawen.







Impaganetget pay ni Vice Mayor
Franz Ranches bayat ti programana a Ti Konseho ti Vigan a
naipatangatang iti DWRS itay lawasna a kasapulanen a maipatungpal
uray total ban ti fireworks iti core zone wenno iti Heritage Village
ditoy.

Masarakan iti Heritage Village
dagiti daan a pagtaengan a naipatakder idi tiempo dagiti Kastila a
naipangruna a sarungkaran dagiti turista no agpasiarda iti Amianan a
Luzon.

Nakalista daytoy iti Unesco kas
maysa kadagiti heritage sites iti sangalubongan.

Kinuna ni Ranches a daytoy ti
“kapanunotan a balabalana nga iproponer” iti sangguniang
panlungsod tapno adda istrikto a regulasion ken maipakat a
requirement iti panagidispleyan ken storage dagiti paputok tapno
malisian ti insidente ti uram a kas napasamak iti maysa a pagtaengan
ditoy a dimmapo iti itatapog iti baro a tawen.

Dimmapo ti tallo a kadsaaran a
pasdek a nakaibalayan ti FQ Store ket nairaman a nauram ni Florencio
Sy Que, 62, akinkukua iti pagtagilakuan, gapu iti ibebettak dagiti
nakadispley a paputok a tagilako maigapu iti kuitis a mapapati a sinindian ti maysa a reveller kas panangsabatna iti isasangbay iti
baro a tawen.

Nakasuan iti arson resulting to
homicide ni Richard Pugal, 21, baro, residente iti Barangay
Capangpangan gapu iti nasao nga insidente.

Segun kadagiti autoridad, napardas
ti panagkayamkam ti apuy gapu iti ibebettak dagiti tagilako a paputok
a nanglamut iti sibubukel a pasdek.

Kinuna ni Ranches nga adda koma
awareness ken information campaign ken adda dagiti requirement wenno
parameter iti pannakaaramat dagiti paputok tapno malapdan iti
desgrasia.

Kanaig iti insingasing ni Bureau
of Fire Protection Chief Floro Obrero a maymaysa koma a lugar ti
pakailakuan dagiti paputok, kinuna ti bise mayor a posible daydiay
kas maysa a porma ti regulasion iti panagaramat iti paputok.

Kinuna ni Ranches a narigat a
lapdan ti panaggatang dagiti umili iti paputok kadagiti okasion kas
iti Paskua ken baro a tawen agsipud ta “paset ti kulturatayo ken
tradision” a Pilipino ngem kasapulan nga ibalanse no ania ti
ipangpangrunatayo, ti selebrasion wenno proteksion ti publiko.”

Kinuna ti bise mayor a kasapulan
ti ad-adu pay nga edukasion ken inpormasion a pakaipasagepsepan ti
“effective compliance” tapno malapdan ti insidente a kas iti
napasamak ditoy siudad idi baro a tawen.#

Comments are closed.