Footer

EDITORIAL: Lumtuadto kadi ti pudno?

Bayat ti kaaddana iti San Fernando
City kas kangrunaan a bisita iti pannakaselebrar ti Rizal Day idi
Disiembre 30, imbilin ni Pres. Gloria Macapagal-Arroyo ti sabali nga
inbestigasion mainaig iti naduktalan a laboratorio ti shabu iti
Naguillian, La Union ken ti mapapati a panagpasuksok mainaig iti kaso
dagiti Alabang Boys.






Iti immuna, lima a tattao ti
nakasuan gapu iti mapapati a pannakainbolbarda iti naraut a
laboratorio ti shabu a pakaibilangan ti dati a hepe ti polis. Ngem
nadismis ti kaso maikontra kadagiti polis ket ti laeng caretaker ti
nairekomenda a makasuan.

Iti maikadua, napudot a tungtongan
nga adda mapapati a panagpasuksok gapu iti panangdismis ti korte iti
kaso ti droga a nakaisaklanganda dagiti agtutubo a nabirngasan iti
Alabang Boys. Ipetpetteng ti Philippine Drug Enforcement Agency nga
adda umdas nga ebidensia maikontra kadagiti akusado ngem kinuna ti
Department of Justice a nakapsut dagiti ebidensia isu a naibasura ti
kaso.

Daytoy a kaso ita ti sentro iti
panagpalutpot nga ang-angayen ti Senado tapno matuntonan ti
kinapudno. Ngem ti yan ti adatna, agsisimparat dagiti palawag ken
waragawag, ket saan a mapagsisilpo no ania ti pudpudno a napasamak.

Rumbeng laeng nga agtignay ti
Presidente tapno maikkan iti makapnek a pagbanagan dagiti dua a kaso
aglalo ta naiserrek ditoy ti alegasion nga adda panagpasuksok (nupay
saan a direkta nga inyebkas dagiti opisial ti PDEA) a nakainbolbaran
ti sumagmamano a nangato nga opisial ti Departamento ti Hustisia.

Saan a basta maibasura lattan ti
maysa a kaso aglalo ket mainaig iti droga iti sanguanan ti
panangipetteng ti PDEA a napigsa dagiti ebidensia nga iggemda. Ngem
saan met a basta iwalin lattan ti kinuna ti DOJ a saan nga umdas
dagiti ebidensia tapno dumur-as ti kaso iti korte a nagtungpal iti
panangibasurada iti daytoy.

Ngem ti problema kadagiti kastoy a
kaso, adda alegasion ti panagpasuksok. Pudno man wenno saan, saan a
maikkat ti suspetsa dagiti umili a naibasura ti kaso agsipud ta
napaammalan dagiti opisial a nakaipabaklayan iti annongen a mangkita
a maipakat ti hustisia iti asinoman a naglabsing. Kasta met a saan a
maikkat ti panagduadua a nairanta a nakapsut dagiti naidatag nga
ebidensia tapno maikkan dagiti akusado iti abut a lumsotanda no
makadanon ti kaso iti korte.

Saan a malibak nga adu dagiti
dadakkel a kaso a nupay napigsa dagiti ebidensia nga iggem dagiti
nagdarum, saan a dimmur-as iti korte gapu kadagiti teknikalidad nga
inaramat dagiti akusado babaen dagiti de kalibre nga abogadoda tapno
makalusotda.

Kasta
met a nupay nainget dagiti prosecutors tapno mapagballigianda ti kaso
iti korte, naibasura laeng gapu iti in-inut a pannakapukaw iti
interes ti kapolisan a mangsurot iti panagannayas ti kaso.

Iti kaso dagiti Alabang Boys ken
ti shabu lab bust, matuntonan kadi ti hustisia iti sanguanan ti
pammilin ti Presidente a marisut a nalawag dagitoy?

Wenno mairamandanto kadagiti
dadduma a dadakkel a kaso nga in-inut a naglumen kalpasan ti
sumagmamano a lawas a sentroda iti akusasion, alegasion,
pannakakondenar ken nabara a diskusion.#

Comments are closed.