Footer

Isasangbay ti 2009: 170 nadundunor iti paputok; 8 biktima iti naiwawa a bala iti Rehion I

SAN FERNANDO CITY – Agdagup iti
170 dagiti nadunor iti paputok, ken walo ti nagbalin a biktima ti
naiwawa a bala iti pannakasarabo ti 2009, daytoy ti report manipud
ken Police Chief Supt. Luizo C. Ticman, PRO1 regional director, kas
maibasar iti Daily Monitoring Report.







Segun ken ni Ticman, 26 a tattao
ti naaresto gapu iti panagikut ken panagilakoda kadagiti maiparparit
a paputok manipud inrusat ti kapolisan ti rehion uno ti kampania nga
Iwas-Paputok idi Disiembre 16, 2008 ken nagpatingga iti Enero 4
daytoy a tawen.

Linagidaw ni Ticman nga iti baet
ti nagtipon a kampaniada iti Department of Health ken dadduma pay a
maseknan nga ahensia, pinullo dagiti nadundunor gapu iti paputok.

Nupay kasta, kinuna ni Ticman a
generally peaceful ti pannakaselebrar iti Paskua ken Baro a Tawen iti
rehion uno.

Kas maibase iti Daily Monitoring
Report, kaadduan kadagiti nadundunor ti lallaki ket nagsagabada iti
pannakapuor, pannakadunor iti mata ken ima a gapuanan iti watusi,
piccolo, whistle bomb, 5 star, kuitis, dart bomb, pillbox, pla-pla,
super lolo, bawang ken dadduma pay a nabibileg a paputok.

Kinuna ni Ticman nga imbilinnan ti
panangisayangkat dagiti polis iti babaenna iti inbestigasion mainaig
dagiti biktima iti naiwawa a bala tapno maitudo dagiti suspetsa ken
maikkan iti hustisia dagiti biktima.

Kabayatanna, maysa a security
guard ti inaresto dagiti polis gapu iti mapapati a panagpaputokna iti
isasangbay ti baro a tawen.

Nainaganan ti suspetsa a ni Renato
Ferrer Aguinaldo, 48, residente iti Laoag City, baro, security guard
manipud iti 18th of July Security Agency.

Mapapati a pinaputok ni Aguinaldo
ti cal. 38 a paltogna iti parbangon ti Enero 1a nakapuntaan ni Danny
Ramos Niño, 44, residente iti Barangay Cabuusan, Currimao,
Ilocos Norte, baro, truck helper ti Kambal Construction Supply.

Iti Baguio City, madama ti
panaglualo da Alfie Caransa, 19, residente iti Barangay Pinget idi
nadamgisan ti tengngedna iti simmanengseng a bala.

Sinelebraran ni Caransa ti baro a
tawen iti ospital.

Tallo ti naireport a biktima ti
naiwawa a bala iti Ilocos Sur, maysa iti Candon City ken dua iti Sta.
Maria.

Segun iti report, maturog koman ni
Rhea Cunanan, 5, residente iti San Pedro, Candon City idi limsot ti
bala iti sim ti balayda ket nadunor ti likud ti ulona.

Iti Sta. Maria, Ilocos Sur,
nakaiddan ni Virgilio Fernando Ballano, 49, residente iti Barangay
Ampuagan idi mapuntaan iti bala ti kanawan a sakana. Napuntaan met
iti naiwawa a bala ti kanigid a saka ni Rolly Abloy, 39, residente
iti Mindoro, Vigan City bayat ti panangpalabasna iti baro a tawen iti
balay ni Kapitan Salvador Catorna iti Tinaan, Sta. Maria.

Iti Vigan City, natakuatan a
positibo a nagpaputok ni PO1 Joven Pastores, residente iti San
Vicente, Ilocos Sur ngem nakabase iti Sigay PNP.

Naireporten ni COP Maximo Taclas
ti insidente iti provincial headquarters.#

Comments are closed.