Footer

SALAYSAY: Aggibus ti Lubong Inton 2012? (Maudi iti dua a paset)

Napadasan
ti turaytayo ti gimmatang iti ingget ngina a bagas manipud iti
kabangibangna a pagilian ditoy Asia tapno laeng masupusopan dagiti
naapit nga irik dagiti mannalon.







Ngem ad-adda ket a naparigat
dagiti umili agsipud ta kellaat a ngimmina ti presio ti bagas.

Tapno saan a rumikot ti problema,
kapilitan a nagangkat ti turay iti bagas iti sabali a pagilian sana
inlako kadagiti umili.

Ngem uray kasano ti
panangipatalged ti turay nga adda umdas a bagas, nakaat-atiddog ti
pila kadagiti Bigasang Bayan wenno tiendaan publiko a nakaipasdekan
dagiti rolling stores ti National Food Authority.

Gapu ta saan a balanse ti
produksion ken ti populasion, pagtinnaganna, sagrapen ti lubong ti
bisin. Adu ti matay iti bisin. No adu ti agbisin, tumaud dagiti
nagduduma a krimen.

Kasta met a gapu iti panagabuso ti
tao, rimmugit ti atmospera ti lubong. Polusion, kunada. Pinataud
daytoy dagiti narugit nga asuk manipud kadagiti alikamen ken
sasakayan a pinartuat ti tao. Agas-asimbuyok dagiti nangisit nga asuk
manipud kadagiti paktoria, kadagiti nadumaduma a lugan, kadagiti
alikamen a napartuat tapno agnam-ay ti tao iti moderno a panagbiag.

Gapu iti kinarugit ti tangatang,
sagsagrapenen ti tao ti makunkuna a greenhouse effect a makagapu iti
panagbara ti lubong. No saan nga agtignay ti tao, dumtengto ti
panawen a nakabarbaran ti lubong ket rumsua dagiti nadumaduma a
sakit, mapasaran dagiti nadawel a bagyo a mangidateng iti layus,
sumangbay dagiti kalgaw ken karkarna a klima a mangdadael kadagiti
mula ken pakatayan dagiti dingnguen. Adunto a biag ti maungaw ken
sanikua a madadael gapu iti dakkel a pagbaliwan ti klima.

Aggibusen ti lubong gapu iti
partuat ti tao a makaungaw a kas iti bomba nuklear, dagiti chemical
ken biological warfare wenno weapons of mass destruction. Di met la
agpatinggan ti panagpartuat ti tao kadagiti armas a pakaungawan ti
tao ken pakadadaelan ti lubong.

Nasaksian ti lubong ti kinadamsak
dagiti bomba a pinartuat ti tao. Idi maikadua a gubat ti lubong,
ginasut a ribu a Hapon ti naungaw idi pinabettak ti Estados Unidos ti
atomic bomb iti dua a dadakkel a siudad dagiti Singkit tapno
mapadaras ti isusukoda.

Naimatangan ti nakaam-ames a
gapuanan dagiti pangukom a bomba iti Lebanon, Afghanistan, Iraq,
Kuwait ken dadduma pay a paset ti lubong a nagbalin a gubatan gapu
iti panagpingki ti ideolohia ken di panagkikinnaawatan.

Dagiti laeng mammadto ti
mangirakrakurak iti panaggibus ti lubong inton Disiembre 12, 2012.
Ngem ketdi, kuna dagiti astronomers a kadayta a petsa, posible ti
karkarna a panaguurnos ti init ken dagiti bituen a mapasamak laeng
iti rinibribu a tawen. Ngem saan met nga ibaga dagitoy lehitimo nga
astronomer a gibus ti lubong iti dayta a petsa. Awan ti ibagbagada.
Saanda nga ibaga a gibus ti lubong.

Kadatayo a Kristiano, ammotayo
amin (lalo kadagiti managbasa iti Biblia) nga awan ti makaammo iti
panaggibus ti lubong. Ta kas mabasa iti Marcos 13: 31-32:
“Mapukawto ti langit ken daga…” Ngem awan ti makaammo iti
idadateng dayta nga aldaw wenno oras – uray dagiti angheles sadi
langit wenno ti Anak. Ti laeng Ama ti makaammo.

Makaungaw iti direksion ti biag
ken lilibeg iti panunot dagiti palso a padto.#