Footer

SARSARITA PARA UBBING: No Apay a Naalsem ti Mangga (Maudi iti dua a paset)

“No dimo kayat, ibatimi ngarud dagiti kargami a suka, ta inkam la biit uminum ken agpalamiis dita waig ken ni Sikkubeng. Di met mabalin nga itugotmi iti waig ti kargami ta nasalog unay ken akikid ti salogan ket marigatan ni Sikkubeng,” kinuna ti lakay.

“Ay, ay, ay, saan a mabalin! No mapattog dagita, amangan no umalsem pay dagiti bungak! Pumanawkayon!”

Nagpakaasi manen dagiti agamo ngem limmandok ti kinapaidam ni Mangga.

“Daytoy ti laglagipem sika, Mangga, kuna ti maysa a pagsasao: asinoman a dina ammo ti makikadua, agsagrap a kanayon iti didigra!”

Ket pimmanaw dagiti agamo. Aguy-uyaoy ti dila ni Sikkubeng iti rigatna a mangguyguyod iti pangga.

“Dumagaskayo ditoyen ta aginanakayo pay. Nadagaang ti panawen,” inyawis ni Mansanita kadagiti agamo. “Adda ditoy da Sandia ken Tultulaya.”

“Ungaa! Agyamanak, Mansanita. Amo, ditoyta laengen.”

“Nagpaidam met daytan a Mangga. Saanna nga ammo ti makidanggay…” kinuna ti lakay. “Ibatimi man apagbiit ngarud iti linongmo dagiti awitmi ta inkam uminum ken agpalamiis dita waig.”

“Mabalin latta, apo lakay. Saanko nga ipaidam ti aniaman nga adda kaniak.”

Nagturongen dagiti agamo iti waig.

Nasaripatpatan ni Mansanita ni Pul-oy a nangkamang ken ni Mangga a matmaturog. Binuyana daytoy. Nagkarasakas dagiti bulong ket nakariing ni Mangga iti pannakaililina.

“Hoy, Pul-oy, apay a siningam ti pannaturogko?” nakaunget ni Mangga.

“Saanka met a sininga, apo Mangga. Lumabasak laeng…”

“Siguro, kayatmo a takawen dagiti bungak, ania?”

“Saan, apo Mangga…”

“Aglibakka pay laeng! ‘Pay man ta katosanka, um, um!”

“Annay, annayko! Isunan, nasakit!”

“Gunggonam dayta! Kayatmo pay?”

Nagrungaab ni Pul-oy.

“Ania koma ti pagsangitam? Pumanawkan! No dika pay la pumanaw, katosanka manen!”

Agrungrungaab ni Pul-oy a pimmanaw.

“Ay, kaasika met Pul-oy, umayka,” inarakup ni Mansanita ni Pul-oy.

“Isunan, Pul-oy, dikan agsangit, dumtengto ti panawen nga aggibus ti kinadangkok dayta a pangas,” inyay-ayo met ni Tultulaya.

“Sobran ti aramid dayta a Mangga! Saan a maymaysa ti aldaw!” nangemkem ni Sandia.

“Agyamanak kadakayo, Mansanita, Tultulaya ken Sandia. Ngem agawidakon,” imbaningrot ni Pul-oy.

“Saankan nga agay-ayam? Umayka, intay agay-ayam idiay bangkag,” inyawis da Sandia ken Tultulaya.

“Agyamanak kadakayo amin ta isakitdak. Agawidakon. Innak agpulong kada Manong Bagyo ken Manong Allawig.” Ket nagdardarasen ni Pul-oy a pimmanaw.

Nabiit a nakasangpet ni Allawig iti yan ni Mangga.

“Mangga, ammom kadi wenno dimo ammo a di nainkalintegan ti inaramidmo iti kabsatmi ken ni Manong Bagyo? Agpakawanka laengen tapno nasayaat ti tungtongan…” ababa ngem natangken ti panangibalikas ni Allawig.

“Ania koma a rason nga agpakawanak? Ni Pul-oy ti nagbasol, saan a siak! Panggepna a takawen dagiti nagsasam-it a bungak!”

“Awan ti pulimi a mannanakaw!” ngimmato metten ti timek ni Allawig. “Ibabawim ti insawangmo, ibabawim!”

“Diak ibabawi!” natangsit latta ni Mangga.

“Ibabawim no kunak, ibabawim!”

“Saanka a kabuteng! Saankayo a kabuteng nga agkakabsat!”

“Kasta aya?” Nagtayyetayyek ni Allawig ket nangparnuay iti kasla imbudo nga angin sana sinallukoban ni Mangga. Naregreg dagiti amin a bunga ni Mangga ket nalusaklusak. Naspak dagiti sangsangana.

“Aglisikayo, Mansanita, Tultulaya ken Sandia. Alaek dagita a bariles ta digosek man iti suka daytoy a pangas tapno agnakem!”

Ket indigos ni Allawig ti walo a bariles a suka ken ni Mangga. Uray la naulaw ken nagtungtunglab ni Mangga.

Nagpangta ni Allawig sakbay a pimmanaw: “Daytoy ti laglagipem, tunggal malabsanka ken tunggal lumabas ni Manong Bagyo, rurosenmi amin a sabong ken bungam! Tuktukkolenmi amin a sangam!”

Ket gapu ta nakaal-alsem ti suka a naidigos ken ni Mangga, pimmanaw metten ni Sam-it. Nakitana da Mansanita, Tultulaya ken Sandia ket nagnaeden kadakuada. Simmam-it ti bunga dagitoy nga agtubtubo iti daga ket nagbalinda a kaay-ayo a kanen dagiti ubbing.

Sipud idin, naalsemen ti bunga ti Mangga. Tunggal dalapusen ti bagyo wenno agallawig, maruros dagiti sabong ken bungana, matuktukkol dagiti sangana, matuang wenno mabual.

Saan ngamin nga ammo ni Mangga nga asinoman a dina ammo ti makikadua, agsagrap iti didigra ket ti managparabur, awan kenkuana ti bumusor.

Comments are closed.