Footer

Umuna a lawas ti 2009: 2 natay, 7 nadundunor iti nagsisina nga aksidente

BANTAY, Ilocos Sur – Makalawas
kalpasan ti itatapog ti tawen 2009, nagsasaruno dagiti aksidente iti
probinsia a nakatayan ti dua ken nakadundunoran ti pito a tattao.







Nadunor da Romel Paet, 20, baro,
residente iti Bulag East, ditoy nga ili, ken Nelson Sipin, 24,
naasawaan, residente iti Barangay 4, Bantay gapu iti panagdinnungpar
ti luganda.

Mapapati a linabsan ni Paet a
naglugan iti Honda XRM ti traysikel a minaneho ni Sipin ket iti
panagsublina iti liniana, napasamak ti panagdinnungpar dagiti dua a
lugan.

Iti sabali pay a damag, dinungpar
ti motorsiklo a minaneho ni Gilbert Pimiento, 21, residente ti
Kimmarayan, Santo Domingo, ni Florencio Barara, 50, naasawaan,
residente iti Guimod, Bantay a puon ti nakayospitalanda a dua.

Mapapati a nagpatengnga ni Barara
iti kalsada nga agpara iti lugan ket di napakadaan ni Pimiento ti
panagatrasna a nakadungparanna iti biktima.

Iti Narvacan, dinungpar ti Toyota
Tamaraw FX a minaneho ni Jaime Castañeda, residente iti
Barangay 9, Vigan City ni John Siddayao, agnaed iti Sulvec iti daytoy
nga ili.

Mapapati a kellaat a bimmallasiw
ti ubing iti kalsada ket nupay nagpreno ni Castañeda,
nadungparna latta a nagsagrapan ti biktima iti sugat iti ulo.

Intaray ni Castañeda ti
ubing sa simmuko iti kuerpo ti polis iti Narvacan.

Iti Sta. Lucia, natay ni Benjamin
Habon, 15, barito, residente iti Cabaritan, Sta. Lucia idinto a
nadunor ti inluganna a kabsatna, ni Leonard, 17, ken ti
kinadinnungparda a da Ronel Solimen ken Joey Dapli-an, agpada a
residente iti Man-atong, Suyo, Ilocos Sur.

Mapapati a sinakup ti motorsiklo a
nagluganan ti natay ti linia ti traysikel iti national highway a
sakup ti Suagayan, Sta. Lucia a puon ti nagdinnungparanda.

Ditoy met laeng nga ili, naubon
iti barukong ni Marcelino Galima, Jr. 34, naasawaan, taga-Calaoaan,
Candon City gapu iti aksidente a nakainbolbaran ti luganna a Delica
van ken maysa nga Izuzu Elf.

Naitaray ni Galima iti ospital ti
Sta. Lucia sa iti Candon General Hospital ngem natay bayat ti
pannakataming ti sugatna.#