Footer

BANNER NEWS: Opisial, residente ti Banaoang, pilaandat formal complaint kontratista ti BPIP

BANTAY, Ilocos Sur – Mangipila
dagiti opisial ken residente iti Barangay Banaoang ditoy nga ili iti
pormal a complaint maikontra iti kontratista iti maysa a proyekto ti
padanum ti gobierno nasional a nakaipuonan ti pannakadadael ti
pagtataudan ti inumenda a bumarangay.







Segun ken ni Konsehal George
Leones, mangaramid dagiti barangay officials ti Banaoang iti formal
complaint maikontra iti kontratista iti Banaoang Pump Irrigation
Project tapno masolbar ti problemada iti danum gapuen iti
pannakadadael ti pagtataudan ti inumenda a pinataud ti pannakaipasdek
ti proyekto iti lugarda.

Kayat dagiti bumarangay a masimpa
ti pagtataudan ti inumenda sakbay a maileppes ti proyekto ti padanum.

Segun iti maysa a barangay
official, inkari ni Engr. Santiago Gorospe a solbarenda ti problemada
iti danum sakbay a pumanaw ti NIA ngem agingga iti agdama, awan pay
ti makitada nga addang dagiti kontratista para iti pannakasolbar ti
problema.

Iti kallabes, agtaud ti inumen
dagiti residente iti ubbog manipud iti bantay ngem nadadael ti
pannakakarambana idi naipasdek ti BPIP iti nasao a barangay.

Iti agdama, ibakbaklay ti NIA ti
makunsumo iti elektrisidad a mangkunkunnot iti danum manipud iti
impasdekda nga artesian well tapno dumanon kadagiti pagtaengan dagiti
bumarangay.

Nasurok a P10,000 ti electric bill
a baybayadan ti NIA a binulan, segun ken ni Banaoang, Bantay Barangay
Captain Naty Leones.

Problema dagiti residente ti
Banaoang ti pangalaanda iti pagbayadda iti koriente inton pumanaw ti
kontratista ti NIA apaman a malpas ti proyekto.

Kinuna ni Leones nga idatagto
dagiti barangay officials ti reklamoda iti sangguniang bayan ket
mangipilanto ti konseho iti formal complaint maikontra iti
kontratista ti NIA.

Proyekto
ti gobierno nasional ti BPIP ket no malpas, manamnama a
mabenepisiaran dagiti mannalon iti sumagmamano nga ili iti umuna a
distrito ti probinsia ta addanton pagtaudan iti padanumda a
pagpalayas kadagiti kataltalonanda.#

Comments are closed.