Footer

Pangulo ti BFP napaayaban iti konseho ti siudad

VIGAN CITY – Paayaban ti konseho
ti siudad ti pangulo ti Bureau of Fire Protection tapno mangted iti
briefing mainaig iti napasamak nga uram iti Barangay I ditoy siudad
iti apaglabes ti isasangbay ti baro a tawen.






Segun ken ni Konsehal Audie
Agdamag, mapagsaludsodan ni City Fire Marshall Floro Obrero mainaig
iti uram a nangpadapo iti maysa a komersial a pasdek ken nakatayan
iti akinkukua a ni Florencio Sy Que, 62.

Kinuna ni Agdamag a maaramat ti
briefing para iti panagpartuatda iti resolusion wenno ordinansa tapno
malapdan ti pannakaulit ti uram ditoy siudad ken tapno maammuan
dagiti kasapulan ti BFP para iti nadardaras a panagrespondeda no adda
mapasamak nga uram iti siudad.

Dimmapo ti tallo-kadsaaran a
pasdek a kukua ni Que ket nairaman daytoy a natay gapu iti nadaras a
panagkayamkam ti apuy gapu iti panagbettak dagiti tagilako a paputok
iti pagtagilakuan iti umuna a kadsaaran.

Napilaanen iti kaso nga arson
resulting ti homicide maikontra ken ni Richard Pugal, 21, residente
iti Capangpangan ditoy.

Segun iti inbestigasion dagiti
polis, mapapati a bimtak ti kuitis a sinindian ni Pugal iti yan
dagiti paputok ket nagramaram ti apuy a nakaigapuan ti uram.

Kanaig daytoy, kinuna ni Vice
Mayor Franz Ranches a kasapulanen a maipakat ti selective ban iti
paputok wenno adda maituding a lugar a pakailakuan iti paputok.

Iti immun-una nga interbiona iti
media, kinuna ni Obrero nga isingasingna iti konseho a maymaysanton a
lugar ti pakailakuan dagiti paputok ken adda salaknibda tapno
malisian ti pannakapasamak ti uram.

Segun iti bise mayor, kasapulan
metten a maipakat ti total ban iti core zone wenno iti Heritage
Village.#

Comments are closed.