Footer

Relokasion dagiti biktima ti aluyo, kitkitaen ti gobierno munisipal ti Aringay

SAN FERNANDO CITY – Nagballaag ti
Office of the Civil Defense, Regional Office I ditoy kadagiti amin
nga agnaed iti igid ti baybay nga umakarda pay laeng iti nangato a
lugar agingga iti saan nga agsubli iti normal a kondision ti
kabaybayan ditoy.







Imballaag ti nasao nga opisina
daytoy idinto nga impakaammona a kumitkita ti gobierno munisipal ti
Aringay ken dagiti iti posible a pakairelokaran dagiti agnaed a
naapektaran iti storm surge iti paggiananda a nataltalged a lugar.

Nagmimiting dagiti lokal nga
opisial ti Aringay ken ti Regional Disaster Coordinating Council
(RDCC) tapno pagsaritaanda ti plano a pannakaiyalis dagiti
naapektaran a pamilia iti lote a kukua ti Philippine National
Railways iti Barangay Poblacion.

Kabayatanna, kinuna ti Department
of Social Welfare and Development ditoy rehion nga agtultuloy ti
panagited ti opisinada iti tulong kadagiti pamilia a naawanan iti
pagtaengan gapu iti panagaluyona idi Enero 10.

Segun iti DWSD, agdagup iti 77 a
kabalbalayan ti total a naiyanud idinto a 10 ti partial a nadadael
gapu kadagiti dadakkel a dalluyon a nakaapektaran iti 90 a pamilia a
buklen iti nasurok 460 a residente iti Barangay Alaska, Aringay.
Nupay kasta, awan ti naireport a natay iti dayta nga insidente.

Immuna a naibakuit dagiti apektado
a residente iti Berlin-Alaska Elementary School idinto a
nangipatakder dagiti dadduma iti temporario a pagnaedanda ken napan
nakipagnaed dagiti sabali kadagiti kabagianda nga adda iti natalged a
lugar.

Kinuna ni Marlene Peralta,
assistant regional director ti DWSD, nga agtultuloy ti panagsangpet
dagiti tulong ket naiwaras kadagitoy kadagiti apektado a pamilia.

Nagiwaras met ni Dip. ti second
district Tomas Dumpit, Jr iti tallo sako a bagas, noodles ken kape
kadagiti biktima ti storm surge, malaksid laeng dagiti tulong manipud
iti Philippine National Red Cross, PDCC, Department of Health ti
Region ken ti lokal a gobierno ti Aringay.

Kinuna ti DWSD nga agtultuloy ti
nainget a panangmonitor ken pannakatulong dagiti apektado a pamilia.#