Footer

River cruise, saan la a pagbuyaan iti aglawlaw, pakasursuruan iti historia ti Vigan: Mayor Eva

VIGAN CITY – Pito a paset ti
historia daytoy a siudad ti maipattopattok a maipasdek babaen dagiti
estatua iti igid ti karayan Mestizo kas paset ti river cruise a
proyekto ti gobierno ti siudad a pangawis kadagiti turista.







Daytoy ket
maysa a river cruise a saan laeng a buybuyaem ti aglawlaw ti Vigan no
di pay adda masursurom maipapan iti historia ti Vigan,” daytoy ti
imbaskag ni Mayor Eva Marie S. Medina iti interbio kenkuana ni Jun
Ramos itay nabiit a naipatangatang iti DWRS.

Impalgak ni Medina nga addanto
pito nga estasion a pakaipatakderan dagiti estatua a mangiparang
kadagiti kangrunaan a pagteng iti historia ti Vigan kas iti
isasanglad ni Juan de Salcedo ken dadduma pay a pagteng, ken dagiti
tradisional nga industria kas iti panagaramid iti burnay, damili,
abel ken sinelas, ken dagiti makan a kas iti longganisa, bagnet ken
sitsaron. Maikabil dagiti estatua iti igid ti karayan a pasiaren
dagiti turista bayat ti river cruise iti Mestizo River.

Kinuna ti mayora a madama ti
pannakaisagana ti karayan para iti nasao a river cruise a manamnama a
mairusat iti bulan ti Mayo a panangselebrar ti siudad iti Viva Vigan
Festival of the Arts.

Mangrugi ti river cruise iti
Barangay 2 agingga iti Barangay Tamag, segun iti mayora.

Rinibribu a turista ti manamnama a
sumangbay ditoy siudad iti umuna a lawas ti Mayo daytoy a tawen a
maysa a kangrunaan nga atraksion ti Binatbatan Street dancing
competition.

Mainaig kadagiti fish cages iti
Barangay Tamag, impasingked ti mayora a saanda a maapektaran iti
proyekto ti siudad a river cruise.

Kinuna ni Medina a paset ti
panagbiag dagiti agindeg iti igid ti karayan dagiti fish cages ket
saanda a maapektaran iti maisayangkat a river cruise no di
maiyurnosda laeng.

Kinuna ti mayora a kasla sampan ti
paaramidda a bangka a kabaelanna a kargaen ti manipud iti sangapulo
ket uppat agingga iti sangapulo ket innem a tao, ken nagtimbukel ti
tuktokna.

Plano idi a karaman a daliasaten
ti river cruise ti dan-aw iti likudan ti Arsobizpado de Vigan ngem
saanen a maituloy gapu ta saan a makalasat ti bangka iti sirok ti
kalsada iti Govantes dike.

Maysa idi nga isla ti Vigan ket
ditoy ti sangladan dagiti komersiante nga Intsik nga agimaro iti
tagilakoda kas sukat kadagiti produkto ditoy.#

Comments are closed.