Footer

Saganaan, nalamlamiis a tiempo: PAGASA

BAGUIO CITY –
No planom ti agbakasion ditoy siudad, mangisaganaka iti napuskol nga
ules ken diaket gapu ta agtultuloy ti ilalamiis ti panawen ditoy,
daytoy ti imballakad ti Philippine Atmospheric Geophysical and
Astronomical Services Administration

(Pagasa
).






Kinuna ni
Wilson Locando, weather forecaster ti
Pagasa
nga agtultuloy ti panaglamiis ti tiempo gapu iti ipus ti cold front a
mangap-apektar iti akin-amianan a Luzon ken ti northeast monsoon nga
aggapu iti China.

Manipud iti 11.4 degrees Celsius a
nairekord idi Domingo, Enero 11, bimmaba manen ti temperatura ditoy
siudad iti 10.4 degrees Celcius, itay Lunes sa ngimmato bassit iti
10.6 degrees iti Martes sa nagsuek manen iti 9.8 itay Enero 14.

Nairekord ti 9.6 degrees Celsius a
temperatura ti siudad idi laeng Enero 3 ngem agbaliwbaliw ti
temperatura manipud iti 10 agingga iti 11 degrees Celsius iti
sumagmamano nga aldaw kalpasanna.

Kinuna pay ni Locando a manamnama
nga agtultuloy ti nalamiis a tiempona agingga iti maudi a lawas ti
Pebrero.

Kabayatanna, manamnama a
nalamlamiis pay kadagiti sumagmamano a munisipio iti probinsia ti
Benguet kas iti Atok, Buguias ken Kibungan.

Masipsiputan ti temperatura
kadagiti nangangato a lugar iti Benguet iti posible a pannakadadael
dagiti mula a nateng iti andap wennofrost bite.

Kanaig daytoy, imballakad ti
Department of Health kadagiti residente ken turista ti panagaruatda
iti napuskol a kawes ken diaket iti panagpasiarda ditoy siudad ken
kabangibangna a lugar tapno maprotektaranda kadagiti sakit kas iti
panateng ken uyek.

Kas maibatay
iti rekord manipud iti
Pagasa,
kalamiisan a temperatura a napasaran ditoy ti 6.3 degrees Celcius a
nairekord idi Enero 18, 1961.#

Comments are closed.