Footer

SALAYSAY: Apay a Saan a Malapdan ti Panagraira ti Krimen? (Umuna a paset)

Tallo dagiti makagapu iti
panagraira ti krimen, segun iti maysa a sinurat ti maysa a nangato
nga opisial ti militar.







Segun iti nasao a sinurat, umuna a
makaigapu iti panagraira ti krimen ti panagkasapulan. Dinakamat ti
sinurat a gapu iti inhustisia, panagabuso, panagkunniber, kinapanglaw
ken dakes a pammati, ngumato ti bilang dagiti maisayangkat a krimen.

Kuna met dagiti eksperto nga
agraira dagiti kriminal iti disso a pagayuyangan ti kinapanglaw, saan
a panagpapatas ti kasasaad ti panagbiag ken kaawan panggedan dagiti
agindeg. Kunada pay a dagitoy ti mangiduron iti maysa nga agindeg nga
agaramid iti dakes gapu ta inkapilitan ken malipit gapu ta saannan a
kabaelan nga ibturan ti nababa a kasasaadna iti biag.

Iti sabali a bangir, agaramid iti
maikaniwas ti maysa a mangmangged iti turay a pakaibilangan dagiti
pannakabagi ti linteg, abogado ti turay, ken uray dagiti hues agsipud
iti kinababa ti sueldoda. Saan a mailibak nga adu dagiti mangmangged
iti gobierno ti mangsirsirot iti sinturonda gapu iti kinarigat ti
panagbiag. Kaarigda ti manok a sangkabirok-sangkaapuyan. Kastay
kunadan, kumpet ti maysa a tao uray iti tadem no malipit. Tapno
masupusopanna ti bassit a matgedanna, kapilitan nga ag-”sariling
sikap” ti maysa a mangmangged. Iti kastoy a situasion, adu a
mangmangged ti maigarangugong iti derraas ti krimen tapno laeng
mabiagna ti bagina, wenno ti pamiliana.

Adda pay dagiti mairubo nga
agaramid iti krimen gapu iti kaadda ti ir-irukenda a nagramut iti
kaawan ti panagkikinnaawatan ken iti pammaliiw a kaadda iti di
nainkalintegan a panaglalangen. Isayangkatda ti krimen gapu iti
pammaliiw wenno pammatida a pannakarabngis ti kalinteganda wenno saan
a pannakaited kadakuada ti tumutop a hustisia iti inhustisia a
nalak-am wenno nasagrapda.

Iti sabali a
bangir, adda masulisog nga agaramid iti krimen gapu iti kaadda iti
sapasap a panagkunniber iti opisina wenno iti ahensia a
pagtrabtrabahuanna. Adda pagsasaotayo nga uray kayo a bagnet, sumged
no maiyasideg iti apuy. Wenno tay kunada:
kastoy
ti aramid ni pulano, di met madusa, apay ketdin a diak aramiden?

Segun iti maysa nga autoridad,
maysa pay a makaigapu iti krimen ti kaadda iti oportunidad nga
agaramid iti dakes. Kunana nga agaramid ti tao iti krimen gapu iti
pammatina a nalakana nga ibanag ti dakes a panggepna ken narigat a
matiliw. Kasta met a no matiliw, nalakana a malusotan daytoy.

Pagarigan ti umad-adu a bilang ti
panagkidnap ken panaghold-ap kadagiti bangko. Naturtured dagiti
kriminal nga agaramid iti krimen gapu ta natalgedda a saan ida a
makamatan dagiti polis gapu iti kadaan dagiti ramit nga
ar-aramatenda, kas iti sasakayan, armas ken komunikasion. Gapu ta
planuen dagiti managdakdakes dagiti iwayatda a krimen, ken moderno ti
komunikasionda, maibanagda ti operasionda iti sumagmamano laeng a
darikmat. Iti sabali a bangir, gapu ta daan ti komunikasion ken
karagkarag ti lugan dagiti pannakabagi ti linteg, nakaaweren a
nabayag dagiti managdakdakes no dumteng ti arayat.

Saan laeng a ti kinadaan ti lugan,
ken ramit-komunikasionda ti areng-eng dagiti polis no di pay iti
kakirang ti abastoda a gasolina nga aramatenda iti panagrekoridadda.
Ngem ti pagsanamtekanda unay ti kinababa ti klase dagiti armas nga
isarangetda kadagiti managdakdakes nga armado kadagiti high-powered
nga armas.

Kaadduan kadagiti police stations
iti pagilian ti agpampannuray iti tulong manipud kadagiti lokal a
gobierno nga akinsakup kadakuada tapno laeng masupusupan dagiti
kasapulanda tapno maipaayda ti serbisio kadagiti tattao nangnangruna
iti urnos ken talna. Yan ti problema, adu nga ili ti napanglaw ken
agpampannuray lattan iti bingayna iti internal revenue allotment ket
saan a nakakaskasdaaw a saanda met a maited amin a kasapulan dagiti
polis.

(Adda
tuloyna)

Comments are closed.