Footer

BANNER NEWS: P160-M pategna a mula a marihuana, pinag-ot, pinuoran ti PDEA, PA, polis

SAN FERNANDO CITY – Napuoran iti parade ground ti Camp
Brig. Gen. Oscar C. Florendo ditoy itay Enero 23 dagiti napag-ot a
mula ti marihuana babaen dagiti nagtitipon nga elemento ti Philippine
Drug Enforcement Agency (PDEA), Philippine National Police (PNP),
Philippine Army, Philippine Air Force a nangisayangkat iti operasion
iti plantasion daytoy maiparparit a mula iti tri-boundary ti Ilocos
Sur, La Union ken Benguet manipud Enero 14 agingga iti 19.







Mismo a ni Police Chief Supt. Ramon V. Gatan, PRO1
Deputy Regional Director for Administration ti nangidaulo iti
ceremonial burning dagiti napag-ot a mula a marihuana a paset dagiti
pinag-ot ken pinuoran dagiti raiding teams iti 12 ektaria a
plantasion.

Mapattapatta a nasurok a P160 milion ti pateg dagiti
mula a marihuana a kinumpiska ken pinuoran dagiti nagtitipon nga
operatiba ti polis iti insayangkatda nga 6-nga aldaw nga operasion
iti plantasion daytoy maiparparit a mula iti nagbeddengan dagiti
tallo a nadakamat a lugar.

Segun iti report manipud ken ni Supt. Robero Opeña,
Cordillera regional director ti Philippine Drug Enforcement Agency,
nagtitipon dagiti elemento ti PDEA, polis, ken Philippine Army iti
babaen ti “Oplan Buntot Pusa” a nangisayangkat iti operasion
kadagiti plantasion ti marihuana a mapattapatta nga aglawa iti 12 nga
ektaria a masarakan iti Barangay Licungan, Culliang ken Mt. Bangao,
Barangay Caoayan iti Sugpon, Ilocos Sur; Sitio Lebeng, Barangay
Badeo, Sitio Tanap ken Barangay Tacadang a sakup amin ti Kibungan,
Benguet.

Pinag-ot ken pinuoran dagiti operatiba ti aganay 795,000
a fully grown a marihuana ken 44,200 a seedlings ken nakakumpiskada
iti 2.5 kilos a bukel daytoy maiparparit a mula.

Natiliw bayat ti operasion ti maysa a mapapati a
mangtartaraken kadagiti mula a marihuana a nainaganan a maysa a Santy
Del-amen, residente iti Sitio Naba, Barangay, Caoayan, Sugpon, Ilocos
Sur.

Nakumpiska iti suspetsa ti cal. 22 rifle, 6 kilos a
ganagan, ken pagsibog a plastic hose.

Nakasuanen ti suspetsa iti panaglabsing iti Section II
ti Article 16 ti R.A. 9165 wenno Comprehensive Dangerous Drugs Act of
2002.

Kinuna ni PDEA regional office I information officer
Bismarck Bengwayan a nangrugi ti operasion idi pay la Enero 14 a
puntiriada dagiti nasao a plantasion ket immuna a simmang-at ti
advance party ti 503rd Brigade ti Philippine Army ken PDEA RO1 a
nangsekuridad iti nasao a lugar gapu iti report a masansan a
makitkita nga agdakdakiwas ditoy dagiti kameng ti Ilocos Cordillera
Regional Community ti CPP ken dagitoy ti mangit-ited iti proteksion
kadagiti agtartaraken kadagiti nasao a plantasion ti marihuana.

Naidanon met iti nasao a lugar babaen ti TOG-1 ti
Philippine Air Force dagiti elemento manipud iti PDEA RO1 and
Cordillera Administrative Region, Regional Mobile Group 1, Ilocos Sur
Provincial Anti-Illegal Drugs Special Operating Teams, Regional
Anti-Illegal Drugs Special Operating Team, Military Intelligence
1-ISAFP, 302nd Air Intelligence Task Group-PAF, ken Sugpon (Ilocos
Sur) police.

Segun ken ni Bengwayan, daytoy ti kadakkelan a naraut a
plantasion ti marihuana iti pakasaritaan ti pagilian.

Nangisayangkaten
iti kallabes ti PDEA ken PRO1 kadagiti operasion iti nagbeddengan ti
Ilocos Sur, La Union ken Benguet a nakakumpiskaan, nakapag-otan ken
nakapuoran dagiti mula a marihuana nga agpateg iti minilion a pisos.#