Footer

Dagiti papadi ken ti politka Rumbeng kadi a makipaset dagiti papadi iti politika ditoy pagilian? Ma

Rumbeng kadi a makipaset dagiti
papadi iti politika ditoy pagilian?







Masaludsod daytoy gapu iti
imbalikas ni House Speaker Prospero Nograles a saan nga italtalek
dagiti papadi mainaig kadagiti bambanag a pakaseknan ti politika.

Nabatad ti sungbat ni Arsobispo ti
Dagupan City Oscar Cruz: “… saan a mailaksid ti politika ken
dagiti politiko iti Sangapulo a Bilin ti Dios”.

Nabagas dagiti balikas ni Cruz no
sumeksek iti kaunggan dagiti politiko.

Ta saan a malibak, agas-asimbuyok
dagiti alegasion ti panagsuitik, panagpasuksok, panagkunniber,
anomalia a nakaisawsawan dagiti politiko ken dagiti opisial ti turay
nga asideg iti agdama a liderato ket saan ngarud a nakakaskasdaaw nga
agtimek dagiti obispo tapno palagipanda dagiti agtuturay mainaig iti
moral ken etikal nga obligasionda nga agserbi kadagiti tattao.

No taliawen dagiti politiko ti
napalabas, dakkel ti akem ti Simbaan iti pannakapadisi ti liderato ti
turay.

Uray iti daytoy a panawen, saan
pay a mapunas iti panunot dagiti umili a napadisi daydi malalaki a
nag-Presidente Ferdinand Marcos iti puestona gapu iti awag daydi
Jaime Cardinal Sin kadagiti tattao a rummuarda iti pagtaenganda ket
agbarikadada iti Camp Crame a nangipasdekan da Enrile ken Ramos iti
sarikedkedda kalpasan ti napaay a kudeta.

Kasta met a dakkel ti akem ti
Simbaan iti pannakapadisi ni dati a Presidente Joseph Estrada iti
puestona a nagtunged iti panagtakem ni Gloria Macapagal-Arroyo a kas
presidente.

Simrek ti Simbaan kadagitoy dua a
pasamak gapu iti alegasion ti korapsion, anomalia ken panagkunniber
iti administrasion dagitoy.

Pammaneknek dagitoy nga aktibo
dagiti papadi a makipaggamulo iti politika iti pagilian, saan a tapno
agbaliw dagiti mangituray no di mangkalbit iti konsensia dagiti
agtuturay.

Agpayso ti kinuna ni Cruz a
limlimitaran dagiti papadi ti bagbagida kadagiti patangan mainaig iti
etikal a dimension ti politika ken dagiti moral a tagimpen dagiti
politiko, a saan ketdi a ti politika a mismo.

Ngem saanna a kayat a sawen a
saandan nga agtimek iti sanguanan dagiti makitkitada a madi iti
panagituray. Saanna a kayat a sawen nga agulimekda lattan iti bulok a
pannakaipagna ti sistema ti gobierno.

Malaksid iti media, dagiti papadi
ti kangrunaan a patien dagiti umili. Ti timek dagiti papadi ti dakkel
a padagsen iti konsensia ti politiko, nainget nga anniniwan nga adda
iti likudanna uray sadino ti papananna, kaarigna iti pul-oy a
mangkalbit kenkuana iti tiempo ti dagaang ken mangkibin kenkuana
tapno saan a maisiasi iti nalinteg a dalan.

Ti rigatna, awan san ti konsensia
dagiti politiko, agsipud ta pinagbalindan ti politika a pagnaaran,
pamastrekan ken para iti bukodda a pagsayaatan.

Daytoy ti
mangidagdagel kadagiti politiko ditoy pagilian,” kinuna ni Cruz.#

Comments are closed.