Footer

Flood monitoring facilities, naipasdeken

VIGAN CITY – Kinuna ti Philippine Atmospheric
Geophysical and Astronomical Services Administration (PAGASA) nga
addan a naipasdek ditoy probinsia ti flood monitoring system para iti
masapa a pannakaballaag dagiti umili no adda sumangbay a layus tapno
malapdan ti ad-adu a maungaw a biag.







Segun ken ni Jun Paat, hydrologist ti Pagasa main
office, narugian daytoy a proyekto idi Dec 2, 2007 babaen ti
consultative meeting kadagiti municipal mayors iti provincial capitol
tapno maitudo dagiti lugar a pakaikabilan dagiti monitoring
facilities para iti pannakaipadto ti layus.

Kinuna ni Paat nga idi Oktubre a naipasdek dagiti
monitoring facilities kadagiti nadumaduma a a karayan ken kabaybayan
iti probinsia babaen ti panangidaulo ti gobierno probinsial ken iti
Provincial Disaster Coordinating Council (PDCC) nga idauluan ni
Warden Floro Martinez.

Kinuna ni Paat a sangapulo ket walo nga ili iti
probinsia ti nainbolbar iti nasao a proyekto ken nakainstolaran
dagiti flood monitoring facilities.

Naammuan pay ken ni Paat a community-based ti nasao a
proyekto ket babaen dagiti nainstolar a monitoring facilities
kadagiti karayan ken baybay, marukod ti volume ti tudo ken iti
panagdinakkel ti danum kadagiti karayan ken kabaybayan tapno masapa a
maammuan no adda pagpeggadan iti layus.

Kabayatanna, kinuna ni Gov. Deogracias Victor “DV”
Savellano a babaen dagiti monitoring facilities, masapa a mapakdaaran
dagiti umili no adda layus tapno makabakuitda a dagus, ket malapdan
ti ad-adu a maungaw a biag ken sanikua.

Segun
ken ni Paat, babaen kadagiti monitoring facilities, maammuan no
adda peggad ti layus, ket babaen kadagiti barangay officials
maipakaammoda daytoy iti Pagasa tapno ipakdaarna ti mapasungadan a
peggad kadagiti umili a maapektaran iti layus.#