Footer

LGU, NHS ti San Nicolas, I. Norte, agpada a kampeon iti Longganisa streetdancing competition

VIGAN CITY – Taga-San Nicolas, Ilocos Norte dagiti
nangiyawid iti umuna a gunggona iti Category B ken Category C iti
Longganisa streetdancing competition kas tampok a pabuya iti
maikawalo a tawen a panangselebrar daytoy a siudad iti panagsublina a
siudad.







Inawat ti San Nicolas LGU ti P50,000 a gunggonada idinto
a P30,000 ti inyawid ti San Nicolas National High School kalpasan a
naiyawag nga isuda ti nagkampeon ita a tawen iti streetdancing
competition a tinawen nga ang-angayen ti gobierno ti siudad kas
panangrambakna iti panagbalinna a siudad idi 2001.

Rinibribu a tattao ti nagdudupudop iti igid ti kalsada
ditoy manipud iti laud ti Simbaan ni San Pablo, iti Quezon Avenue sa
iti Mena Crisologo Street a yan dagiti daan a pagtaengan a
naipatakder pay idi tiempo dagiti Kastila
agingga
iti Plaza Burgos tapno agbuyada iti daytoy tinawen nga streetdancing
competition a pakaitampokan ti langgonisa, maysa kadagiti kangrunaan
a produkto daytoy a siudad kas paset ti panangrambak ti Vigan iti
panagsublina a siudad.

Tallo a kategoria ti nagsasalipan dagiti partisipante
iti streetdancing: ti Category A a nagsasalipan dagiti agad-adal iti
elementaria, Category B a nagsasalipan dagiti agad-adal iti
sekundaria, ken Category C a nagsasalipan dagiti agad-adal iti
kolehio ken local government units.

Pito ti nagsasalip iti Category A, uppat iti Category B,
ken innem iti Category C.

Dagiti sumaganad dagiti nangabak ken ti premioda:

Category A: Burgos Memorial School East, umuna a
gunggona – P30,000; Tamag Elementary School, maikadua – P20,000; ken
Burgos Memorial School West, maikatlo – P10,000;

Category B: San Nicolas National High School, umuna a
gunggona – P30,000; Ilocos Sur National High School, maikadua –
P20,000; ken Vigan National High School West, maikatlo a gunggona –
P10,000;

Category C: San Nicolas LGU, umuna a gunggona – P50,000;
Andap Bigueno, maikadua a gunggona – P30,000; ken Fuerte Dance
Troupe, maikatlo – P20,000.

Kabayatanna, impakita dagiti longganisa producers ditoy
siudad iti partakda nga agaramid iti daytoy a produkto iti Extreme
Longganisa Challenge a naangay iti sanguanan ti city hall ditoy iti
bigat ti Enero 22.

Ti grupo da Joy Peralta ken Rosario de Guzman, agpada a
residente iti Barangay Pagpartian ti naideklara a kapartakan kalpasan
a nakaaramidda iti agatiddog iti 33.5 metro a longganisa iti beinte
minutos.

Maikadua a kapardasan da Digna Marquez ken Catherine
Vera a nakaaramid iti longganisa nga agatiddog iti 28.8 metro ken
maikatlo da Marilou Parguian ken Natalie a nakaaramid iti agatiddog
iti 22.59 metro.

Maikapat laeng ti grupo ni Maricar Sotuza a nakaaramid
laeng iti 22.22 metro ti kaatiddogna a langgonisa iti 20 minutos.#

Comments are closed.