Footer

OPINION: Materialismo: Tawid kadagiti Amerikano (Umuna a paset)

TI materialismo
wenno kinaagum ken kinagamrud iti pirak wenno material a banag ket
maysa itan a galad ni Filipino. Marukod wenno matukadan ti amin a
banag nga intayon aramiden babaen ti kasukatna a gatad ti pirak wenno
nainlubongan a bambanag.






Awaen dagidi makunkuna nga “utang
a naimbag a nakem” wenno tay pangngarig ti lallakay a “ni ayat
subadanto met la iti ayat”, no di ket ania man nga inka maipaay
wenno magapuanan ket masapulen a masubadan wenno marukod babaen ti
gatad nga inkanto lak-amen a kas kasubalitna.

Idi un-unana nga aldaw, no
agbangonka iti balay, inka la ipakaammo kadagiti kaarrubam ket
indanto met tumulong babaen ti inda panangiyamoyo kadagiti putek,
adigi nga algarruba wenno ipil, pan-aw wenno nipa ket dagidiay awanan
kadagitoy ipaaydanto metten ti bannogda a makipagbangon iti
pagtaengan. Ti la isubalit ti agpasken tay inna panangipaay iti
mainum ken makan. Kalpasan ti trabaho, mabalinto la a mautang ti
naimbag a nakem dagiti timmulong. Isu daytoy daydi maipangpangas nga
“espiritu ti bayanihan wenno panagiinnamuyo”. Ngem itan masapul a
patganda ti bayad dagiti ipaayda a material wenno bannog babaen ti
gatad ti pirak wenno ania man a material a napateg.

Idi, dagiti kandidato a papili iti
ania man a pagsaadan inda la makilamano ken makisarita kadagiti
botantes, inda umutang iti naimbag a nakem ket maudida a mautang
kadakuada. Ita, masapulen nga adda ipapetpetmo a saan a nababbaba
ngem tay “Aquino” tapno inda isurat tay naganmo idiay balota. Ket
uray inton malpas ti panagpipili, indanto pay la rengrengen ti tulong
a pirak a para piesta, pangiruar tay masakit diay ospital, wenno
paggatang ti lungon tay minatayda. Isu a dagiti kayatna ti agserbi a
sipupudno ket agamak wenno agbutengda gapu ta awan ti kuartada nga
inda usaren a pagyaman iti botos ni botante. Isu a kaaduanna itan
tay makunkuna a “kurakot” ta ania ngarud ket masapul met nga
abrotenda tay nagastosda a nagkandidato.

Daytoy ti gapuna a saantayo a
pulos nga umasenso iti panagbiag ta ti agpaay koma a panggastos
kadagiti pannakaaramid iti kalsada, pasayak wenno pasdek ti
pagadalan, rangtay wenno ania man nga agpaay a pangpasayaat iti
biagtayo a tattao, ket mapukawda babaen ti pannakainut-inut a
makunniber babaen tay nababa ti kalidad a pasdek ta agab-abrot met
dagiti agtuturay iti adu a gastosda idi inda pinagpapili iti saadda.
Daytoy ti gapuna a dagiti appo nga agtuturay ket saanen a dagiti
imbag a maipaayda iti tattao ti ad-adda a panunotenda no di ket ti
maibulsada iti kantidad nga aggapu iti CDF wenno CIAda.

Idi un-unana a tiempo, siasino man
nga addaan saad iti gobierno ket namnamaem nga umay tumulong kenka
babaen ti inka pannangipakaammo kadagiti problemam. Kas koma ken apo
agriculturist, no maammuanna nga adda problema ni mannalon,
agtartaray a mapan tumulong a mangsolbar iti problema. Ngem itan,
saandan nga aggunay no awan ti mabalinmo nga ibaga a paglugananda,
wenno awan tay mapugpogan a kalding wenno aso a mapagsasanguan. Isu a
no dadduma ti awag ti tao kadagiti appo a “technician” ket
“picnicians”.

Kinapudnona, uray payen dagiti
dadduma a mangisursuro ket saan payen a ti masursuro dagiti ubbing
nga adalanda ti nasken no di ket tay pannakaingato ti sueldoda wenno
dagitay negosioda ti importante. Uray pay dagiti superbisorda ket
ad-adda payen diay bukodda a panguartaan ti inda ipampamaysa a di ket
tay inda panangkita a nasayaat ti panangisuro dagiti babaenda
kadagiti ubbing.

(Maituloyto)