Footer

Bise mayor, kuinestionaranna ti naangay a session idi Dis. 19 ken 22

CABUGAO, Ilocos Sur – Kinuestionaran ti bise mayor ditoy
ti dua a session a mapapati a pannakaaprobar ti budget ti ili a saan
a napakaammuan.






Kuinestionaran ni Vice Mayor Rex Morales ti
pannakapasingked dagiti minutes ti miting ti regular session idi
Disiembre 22 ken special session idi Disiembre 19 gapu iti mapapati a
kaawan quorum.

Pinasingkedan ti konseho itay naudi a session ti minutes
ti miting ti special session idi Disiembre 19, regular session idi
Dis. 22 iti baet a mapapati a saan a napakaammuan ti bise mayor.

Mapapati a naangay ti special a session tapno
maaprobaran ti baro a budget.

Nagsaruno a closed door ti naangay a session ti
sangguniang bayan ditoy a mapapati a sentro ti diskusion ti
pannakapatalged ti minutes ti special session idi Dis. 19 ken regular
session idi Dis. 22 ken pannakaikkat ti grants and donations para iti
mayor, bise mayor ken dagiti konsehal.

Agdagup iti P2 milion ti grants and donations a
pagbibingayan dagiti opisial ditoy nga ili.

Naipalaon iti budget ti manamnama a mapastrek ti ili
manipud iti pannakaingato ti water rate ngem iti saan a panangpabor
dagiti konsehal iti daytoy ti mapapati a nakaikkatan ti grants and
donations para kadagiti opisial.

Saan a pabor dagiti konsehal iti pannakaipangato ti rate
ti danum iti sanguanan ti saan nga episiente a panagkolekta ti
Cabugao Waterworks.

Idi damo, inannugot ti maysa nga opisial ti Cabugao
Waterworks a 60% laeng ti makolkolekta iti makunsomo a danum ngem iti
simmaruno nagbalin a 20% laengen dagiti delingkuente a consumers.

Ngem maysa a konsehal ti nagkuna a saan a ti
pannakaikkat ti grants and donations ti pakalapdan iti pannakaaprobar
ti budget.

Kinuna ni Morales nga agtalinaed a kuestion ti kaadda
iti quorum agsipud ta temporary presiding officer ti maysa kadakuada.

Mapapati a lima laeng dagiti konsehal a nagatendar iti
espesial a session a nakaaprobaran iti budget.

Immutang ti gobierno munisipal iti bangko para iti
pannakapasayaat ti water system daytoy nga ili ket ti pannakaipangato
ti singir iti danum ti manamnama a pagtaudan ti pagbayadna iti
inutangna.#