Footer

KOMENTARIO: Materialismo, Tawid kadagiti Amerikano (Tuloyna)

Saan la nga isuda no di ket adu pay dagiti tattao a mangipampamaysa kadagiti nainmaterialan a kasapulanda ngem tay inda panagserbi. Kas koma dagiti appo a mangngagas, a no dadduma dida pay kayaten nga agasan tay tao no awan ti ammoda a kuartana. Kasapulanda tay antisipo sakbay nga awatenda ida idiay klinika wenno ospitalda. Kasta met dagiti appo nga abogado, no napanglaw tay klienteda saandan nga ipappapayso tay mangiyabogado kadakuada. Adu payen dagitay madamdamag nga appo a hues a mangilako iti desisionda.

Ket gapu kadagitoy a makitkita dagiti annaktayo, inda metten sursuroten. Saanen a mabaon dagitoy no awan “lagayna”. Didan kayat ti mapan agbasa no awan limapulo a pisos a balonda. Saanda metten nga agkir-in a mangaramid kadagiti rebbengna nga aramiden no awan namnamaenda a subad wenno kasukatna nga imbag. Uray pay dagiti babassit nga ubbing ket saandan a kayat ti agmano wenno agpabisito kadagiti appoda no awan kankanen wenno kuarta a maganabda.

Amin dagitoy ket pinangipakita a napigpigsan nga amang ti kinamaterialismotayo a Filipino ngem tay makunkuna a naimbag a nakem ken pannakitinnulong kadagiti kapatadan ken kaarrubatayo. Awanen ti kaes-eskan tay sao a “Dios unay ti agngina” wenno “Ala, mautangak kenka iti adu unay nga ayat” ta itan, ti kadakkelan a masaludsod ket “mano”. Apay ngata a kasta idinto ta idi un-unana ket maidaydayaw ni Filipino iti kinasayaatna a makiamoyo wenno makibayanihan iti amin a gundaway? Dagitoy a galad ti naipangpangastayo ta uray no napanglaw ken marigrigattayo saantay man idi a mapurar iti pateg ni pirak no di ket iti panangipaaytayo iti ayat iti tumunggal maysa, rigat man wenno nam-ay. Iti napalabas, saan a ti kinaadu ti balaymo wenno kinaadu ti luganmo ti pangibasaran iti kinataom no di ket iti kaadu ti gagayyem ken kaim-immuam a tattao. Ti kinapintas ken kinadakkel ti balaymo wenno ti kinabuslon ti saganam idi ket saan nga isu ti pangdayawanda kenka no di ti kinaadu ken kinapudno ti inka matultulongan a kapatada. Saan a ti kinabuslon ti pirakmo wenno apitmo ti inda dayawen no di ti kinaasidegmo kadagiti makasapul iti tulong ken badangmo. Dagitoy a galad ti nakaidaydayawan ni Filipino. Ngem nagbalbaliw dagitoy itan. Saanen a ti kinasingpet ken kinaasidegmo iti Dios ti importante ita no di ti kinagalantem nga agpadawat ti kuartam wenno tay kinaadu ti paspasurotmo a nauuyong ken naranggas. Mauy-uyaw itan dagiti agaramid ti naimbag ket dagitoy agar-aramid ti kinadamsak ken kinadakes ti maidaydayaw.

Dagitoy amin ket intay nasisip kadagiti appotayo a pupuraw nangruna kadagiti Amerikano nga iti amin a banag ket marukod babaen ti katukadna a pirak wenno material a banag. Kitaenyo dagiti kakabsatna a beterano idi maikadua a gubat toy lubong, idi inda insalda ti biagda para ken Amerika babaen ti inda pananglapped kadagiti Hapon iti inda panangaramid daydi planoda a panangsakop iti lubong, ket indatayo indaydayaw ngem itan ta intayon dawaten a takderanda dagiti karkarida, nalipatandan ta dakkel unayen a gatad ti mapukawda. Isu nga agriingkayo, kakabsat. Isublitayon dagidi nasayaat ken pakaidayawantayo a galad ken kababalin. Lipatentayon dagitoy binulbulodtayo a kababalin ni Amerikano. Laglagipentayo tay adal ti lallakay a “saantayo a maikuyog diay papanantayo dagitoy a sanikua ken kinabaknang no di ket dagiti nasayaat nga aramid ken pakasaritaan ti pakagun-udantayo ken Apo Dios.”#

Comments are closed.