Footer

Lifetime a bayadan ti NIA ti electric bill ti Banaoang: resolusion dagiti bumarangay

BANTAY, Ilocos Sur – Maysa a resolusion ti impasa dagiti
opisial ken residente ti Barangay Banaoang ditoy a nangidagadaganda
iti lifetime a panangibaklay ti National Irrigation Administration
iti electric bill ti danum nga ar-aramatenda nga agindeg.






Segun ken ni Barangay Captain Naty Leones, ipatulodda ti
nasao a resolusion iti NIA para iti madagdagus nga aksion ti nasao
nga ahensia mainaig iti daytoy a problemada a bumarangay.

Iti agdama, ti NIA ti agbaybayad iti electric bill a
makunsomo ti submersible pump nga impasdek ti ahensia a pagtaudan iti
danum dagiti agindeg ditoy a barangay kas sukat ti nadadael a
pagtaudan ti danumda.

Agdagup iti sumurok-kumurang a P10,000 ti baybayadan ti
NIA iti magasto iti koriente ti submersible pump.

Parikut dagiti agnaed no asinonto ti agbayad iti
makunsomo iti elektrisidad no pumanawton ti NIA iti pannakaileppas ti
proyektona iti padanum.

Agtataud ti danum dagiti agnaed ditoy iti maysa nga
ubbog iti bantay ngem nadadael ti pannakakarambana idi nairugi ti
Banaoang Pump Irrigation Project a manamnama a mangpalayas kadagiti
kataltalonan iti umuna a distrito.

Sakbayna, imballaag dagiti opisial ti barangay a
mangipilada iti pormal complaint maikontra iti NIA no saanna a
risuten ti problemada iti danum sakbay a pumanaw iti pannakalpas ti
proyektona a BPIP.

Segun
iti maysa nga opisial ti barangay, ikkanda iti makalawas a pawayway
ti NIA a mangsungbat iti resolusionda ket no awan ti aksionna,
mangaramid ti intero a barangay iti aksion tapno marisut daytoy a
problemada iti danum.#