Footer

PRO1, three-peat kas kasayaatan a police regional office iti pagilian

SAN FERNANDO CITY – Three-peat ti opisina ti polis iti
rehion I ditoy kas Best Regional Office iti sapasap a pagilian.






Inawat ni Police Chief Supt. Luizo C. Ticman ti
pammadayaw ken ni Pres. Gloria Macapagal-Arroyo ken ni PNP chief
Jesus Verzosa iti seremonia a naangay iti Camp Crame itay Enero 26.

Maragsakan ken maipagtangsitko daytoy a pammadayaw a
pammaneknek iti culture of excellence ti PRO1,” kinuna ni Ticman.

Daytoy ti maikatlo a nagsasaganad a pammadayaw a
nagun-od ti PRO1 manipud 2007 ken maikalima manipud idi 1997.

Immuna a napadayawan ti PRO1 a best police regional
office idi 1997 iti babaen ti panangidaulo ni dati a regional
director ken agdama a gobernador ti Pangasinan Amado Espino, Jr, idi
2000 iti babaen ken ni Gen. Jose Yap ken idi 2006 ken 2007 iti babaen
ti liderato ni Gen. Leopoldo N. Bataoil, agdama nga NCRPO chief.

Pakaidayawan unay daytoy dagiti personnel ti PRO1,
manipud iti kangatuan agingga iti kababaan a level,” kinuna ni
Ticman idinto nga innayonna a bigbigenna dagitoy gapu iti naimpusuan
a panagserbida kadagiti umili ti Rehion I.

Nagyaman
pay ni Ticman kadagiti nadumaduma a non-government organizations ken
dadduma pay a sektor ti komunidad gapu iti dakkel a naitulongda iti
pannakagun-od ti PRO1 daytoy a pammadayaw.#