Footer

BANNER NEWS: Substation ti National Grid Corporation iti Bantay, I. Sur, awan back-apna transformer

VIGAN CITY –  Awan ti madadaan a back-up transformer ti substation ti
National Grid Corporation of the Philippines iti Bantay, Ilocos Sur ket
no agdadael daytoy, sagrapen ti sibubukel nga umuna a distrito ti
probinsia ti napaut a power interruption.

Segun ken ni Diputado Ronald Singson, natakuatanna daytoy bayat ti ocular inspection nga inwayatna iti substation ti NGCP iti Bantay, Ilocos Sur gapu iti reklamo a dimmanon kenkuana idi damo nga inwaragawag ti nasao a kompania ti elektrisidad a maiwayat ti power interruption iti uppat nga aldaw tapno adda tarimaanenda iti nasao a substation.

“Kas lider iti umuna a distrito, saanko nga itulok a mapasamak ti uppat nga aldaw a power interruption ta maapektaran unay dagiti households ken dagiti negosio iti probinsia,” kinuna ni Singson.

Gapu iti isusupiat ni Singson, napagtitinongan dagiti inhiniero ti NGCP a saan a matuloy ti naiskediul a power interruption a mangrugi koma iti Enero 31 ken agpatingga iti Pebrero 3 no di maikabassit ti panagawan ti koriento iti 17 nga oras inton Pebrero 7 manipud iti alas singko ti bigat agingga iti alas dies ti rabii.

Kas panangipalawag ni Benigno Ramos, department manager ti NGCP iti interbiona iti media, adda naduktalanda a loose connection a mangpapudot iti uneg ti nasao a substation a mangparnuay kadagiti gases a mangdadael iti insulation ken panagleak iti lana a no saan a matarimaan, posible a pakaigapuan iti dakdakkel a damage ken mabaybayag a pannakatarimaanna.

“Posible pay a bumtak ti substation,” imballaag pay ni Ramos.

Ngem kinuna ni Singson a kasapulanen a maaddaan iti back-up transformer ti nasao a substation tapno saan a mapasaran dagiti agindeg iti umuna a distrito ti mabayag a power interruption no agdadael daytoy.

Kinuna ti mangibagi iti umuna a distrito ti probinsia a lakayen ti  transformer ti substation a mangsuplay iti intero nga umuna a distrito ti probinsia ket kasapulanen nga addan madadaan nga isukat no agdadael.

Naammuan ni Singson nga addan 14 a tawen a maar-aramat ti nasao a transformer ti power supply iti intero nga umuna a distrito idinto a 15 laeng a tawen ti maibilang nga standard a kabayagna.

Kinuna ni Ramos nga idi pay la napan a tawen a nagkid-dawda iti back-up transformer iti opisinada iti Manila ngem awan pay ti aksion dagiti nangangato a turayenda.#

 

Comments are closed.