Footer

INDAYON NI LAGIP: Kalbario

Dear Manong Danny,

Naglaon daytoy suratko iti kapadasak a diakto pulos malipatan iti tungpal biagko.  Napadasak ti kinarigat ti mangged iti ballasiw-taaw  tapno laeng maitedko ti nasaliwanwan a panagbiag iti pamiliak.

Awagannak laeng iti Jean, ina ti dua nga annak, ken agnanaed iti Candon City, Ilocos Sur.

Kas nakunakon, maysaak nga overseas Filipino worker, a nagtrabaho kas domestic helper.  Napadasak ti nagtrabaho idiay Hongkong  sakbay a nagtrabahoak kas katulong iti Syria.

Abril 2008 idi  nagsaritaanmi ken ni lakayko ti panagtrabahok manen iti sabali a pagilian, iti pagilian iti Syria. Kinarigat ti panagbiag ti nangiduron kaniak tapno mapan agpaadipen kadagiti ganggannaet nga amo.

Naannayas met idi damok nga aldaw iti balay ti amok iti Homes, Damascos, Syria ti nagtrabahuak.

Awan problemak iti amok a lalaki no di laeng iti asawana a ni Lina Norque.  Nakasungsungit kaniak, Manong Danny. Diak ammo no apay a nababa ti panangtratarna kaniak.

Pati panagdigosko a masansan ket imparitna pay. Dina kayat a nadalusak. Ngem gapu ta aggagatel met ti bagik no diak aginaldaw nga agdigos, no dadduma, supringek ti bilinna. A puon ti pangsipatanna kaniak. Saan la a dayta, bassit la a kamalik, pagsawsawannak kadagiti balikasda nga agkakadakes.

Adda suspetsak a pagselselosannak. Mabalin a kasta ta no palausen ti agsarita, ad-adayo nga adda pamuyaak ngem isu.

Inan-anusak ti kinauyong ti amok a babai agsipud ngarud ta kayatko ti mangged ken makaipaw-it iti kuarta iti pamiliak.  Uray adu nga unget  ken maltrato a masagrapko iti amok a babai, nagulimekak lattan. 

Ngem adda dagiti gundaway a sumungbatak no kasdiay a diak makaibtur. Ngem Ilokano ti usarek a balikas tapno dina maawatan. No damagenna no ania ti sasawek, awan kunak lattan.

Ngem idi bumayag, dimlawak ta awan met laengen ti maipaima a sueldok idinto nga agtallo a bulanen nga agserserbiak kadakuada. No dawatek ti sueldok, ibaga ti amok a babai nga urayek lattan nga itedna.  Saannak kano a maganatan ta maawatkonto met laeng.

Ngem iti sumagsaganad a bulan, no damagek ti sueldok, agunget ketdin. 

Idi mapalabas ti lima a bulan ket didak met laengen  suelduan, inkeddengko a pumanawak laengen.

“Nasaysayaat daytoy nga aramidek baka ad-adda a dakes ti mapasamak kaniak ditoy,”  nakunak iti nakemko.

Ket iti rabii ti Agosto 23, 2008, naglibasak iti balay iti amok a da Lina Norque ken Navil Nahas, Manong Danny.

         (Adda tuloyna) 

 

Comments are closed.