Footer

KOMENTARIO: Dagiti biktima iti panagabuso iti kalintegan kas tao

Marambakan iti kada Disiembre ti anibersario ti United Nations Declaration of Human Rights.

Idi ni Arsobispo Cruz ti presidente ti Catholic Bishop Conference of the Philippines, nangiparuar iti pastoral letter a nangbabalawanna ti pannakalabsing ti kalintegan dagiti umili ditoy pagilian a ti turay pay ti mapapati nga adda iti likudan dagitoy.

Dinakamat pay ti surat ti pannakaabuso saan laeng iti politikal a kalintegan dagiti umili no di pay ti kalinteganda iti pang-ekonomia, sosial ken pangkultura.

Saan laeng a gapuanan dagiti indibidual wenno grupo ti pannakalabsing ti kalintegan ti tao iti agdama  ngem adda iti porma ti naingimongan a basol – a naipasdek ti istruktura ti kagimongan, polisia ken linteg a pangibaba kadagiti sabali a tattao ken sabali a grupo, nangruna dagiti adda iti akimbaba a sektor ti sosiedad, kinuna ti surat.

Kinuna ti CBCP: “No iwarastayo ti matatayo iti pagilian ita, nadagsen a pakariribukan ken pakadismayaantayo ti kasla saan nga agsarday a pannakalabsing iti kalintegan kas tao.”

Dinakamat pay ti CBCP dagiti kangrunaan a human rights violations kas iti panagkidnap, panagkunniber, panagsuitik iti eleksion ken disenfranchisement dagiti botante, inkapilitan a pannakaaresto ken pannakadusa, pammapatay dagiti puersa ti gobierno ken dagiti rebelde, kinaawan ti aksion ken pannakaitantan dagiti kaso, kinaawan ti patas a pannakausig iti korte, panagsanud dagiti saksi gapu iti pammutbuteng, pannakawaswas dagiti darum babaen ti amicable settlement idinto a tuntonen koma ti hustisia.

Adu pay ti dinakamat ti CBCP a panaglabsing iti kalintegan kas tao kas koma iti illegal a panagrakrak kadagiti pagtaengan, sexual harassment ken domestic violence, pannakaabuso dagiti mangmangged a Pilipino iti ballasiw taaw.

Naumakan, kaka? Adtoy pay: kinapanglaw, pannakapapanaw dagiti natibo kadagiti dagdagada a tawidda kadagiti nagkauna a kaputotanda iti nagan ti panagdur-as, di panangitaltalek iti kalintegan dagiti mangmangged a mangbuangay iti grupo wenno union, nga agwelga, a maaddaan iti seguridad ken tumawar para iti pagimbaganda, panagabuso dagiti lider dagiti union tapno maitag-ay ti bukodda nga interes.

(Adda tuloyna)

Comments are closed.