Footer

Konseho kontraenda panagminas ti Global Titans

CAOAYAN, Ilocos Sur – Nagtignay ti sangguniang bayan ditoy tapno
kontraenda ti aplikasion ti maysa a mining company nga agminas iti
coastal areas daytoy nga ili.

Kinuna ti Konsehal Cudala, chairman ti committee on environment, a kasapulan a protektaran ti sangguniang bayan ti aglawlaw ditoy idinto nga insingasingna a mangaramidda iti resolusion a mangkontra iti aplikasion ti Global Titans Mining Company nga agminas iti coastal areas a saklaw daytoy nga ili.

Naidatag iti konseho ditoy itay nabiit ti maysa a surat manipud iti Department of Natural Resources and Environment Regional Office mainaig iti aplikasion ti nasao a mining company nga agminas iti igid ti baybay a sakup daytoy nga ili.

Segun pay iti surat, maikkan dagiti konsehal iti sangapulo nga aldaw a mangkontra iti aplikasion ti nasao a kompania.

Maipalagip nga idi Nobiembre itay napan a tawen, imbasura ti konseho ti siudad ti Vigan ti aplikasion ti dua a kompania ti minas a pakairamanan ti Global Titans Mines and

Development nga agminas iti coastal areas a saklawen ti Barangay Mindoro ken San Pedro ta kas kinuna ni Vice Mayor Franz Ranches, karbengan ti siudad ti agaksion para iti pannakasaluad ti aglawlawna.

Segun pay iti bise mayor, makarkarkaran ti coastal areas ti siudad aglalo iti panawen ti bagyo a dumakkel ti danum ket no adda agminas, maapektaran a mismo dagiti barangay ti Mindoro ken San Pedro.#

 

Comments are closed.