Footer

Manila-based a kandidata, nagwagayway a Saniata ti Ilocos Sur

VIGAN CITY – Iti sanguanan ti alegasion a saan a puro nga Ilokana
dagiti kaaduanna a nakisalip, maysa a Manila-based a kandidata a
nangibaga a nagtaud ti ramutna iti daytoy a siudad ti napili a Saniata
ti Ilocos Sur iti beauty pageant a naangay iti sango ti provincial
capitol itay Pebrero 1.

Napili ni April Love Jordan ti Vigan City a kas Miss Saniata ti Ilocos Sur; ni Corazon Roldan ti Gregorio del Pilar a Saniata ti Ilocos Sur-Tourism; Paula Camille Figuerras ti Sta. Lucia a Saniata ti Ilocos Sur-Environment; ni Suzanne Tabetha Mendoza ti Vigan City, 1st runner-up; ken ni Mica Avon Mariano ti Vigan City, 2nd runner-up.

Sakbayna, napili ni Jordan a Best in Long Gown, Best in Swimsuit ken Best in Casual Wear; idinto a  Best in Talent ni Figuerras;

Inyalat met ni Leslie Sincioco ti Vigan City ti kina-Miss Photogenic idinto a napili a  Miss Friendship ni Cristine Leah Legarda ti Vigan City.

Iti met Talent Night ti pageant a naangay idi Enero 29, napili kas Star of the Night ni Elizabeth Naluz ti Tagudin.

Kadagiti nangabak, ni laeng Roldan ti mapapati a makaammo nga agsao iti Iluko. Dayta ti nangarusanna kadagiti kinasalipna tapno mapili a Media’s Choice ken Ilocano’s Choice.

Iti presentasion dagiti kandidata iti provincial capitol hall, rimsua ti alegasion a saan a puro nga Ilokana dagiti kandidata kalpasan a naduktalan a dida ammo ti agsao iti Iluko.

Kasta met a limtuad nga ad-adda nga iti Metro Manila ti nagsapulan ti komite kadagiti makisalip a kandidata a makoronaan bayat ti selebrasion ti Kannawidan Festival.

Kadagiti naipresenta a 19 a kandidata, innem laeng ti maibilang a naggapu iti Ilocos Sur idinto a sangapulo ket tallo dagiti Manila-based a kaaduanna kadakuada ti di pay nakaadak iti lugar a kunada a nagtaudan ti ramutda.

Ngem inkalintegan ni Winona Santos, coordinator ti pasalip, a puntiriada ti nailian a pasalip ket agkurkurang iti tayag ni Ilokana. Segun ken ni Santos, agkurang ni Ilokana iti height ta kaaduanna nga umabot laeng iti 5’4” idinto a 5’5” ti minimum height ti kandidata iti nailian a pasalip ti kinapintas.

Kinuna pay ni Santos nga adda darada a 25%  nga Ilokana dagiti simmalip nupay kaadduanna ti nakabase iti Metro Manila.#

 

Comments are closed.