Footer

826 a polis iti rehion 1, naipromot

SAN FERNANDO CITY – Kas paset iti second level ti regular a programa ti
promosion dagiti polis iti 2008, agdagup iti 826 a polis iti rehion I
ti naipromot iti ranggoda itay nabiit.

Kinuna ni Police Chief Supt. Luizo C. Ticman, regional director ti Police Regional Office 1, a “pammigbig iti propesional a kabaelan” iti pannakaipromot dagiti polis iti sumaruno a nangatngato a ranggoda.

Naiyaspili ti baro a ranggoda iti 46 a Police Commissioned Officers (PCO) a pakairamanan 17 Police Senior Inspectors ken 27 Police Chief Inspectors ken 780 a Police Non-Commissioned officers (PNCO) a pakaibilangan ti 423 a Police Officer 1 (PO1) a naipromot a Police Officer 2 (PO2); 118 PO2s a naipromot a  PO3; 33 PO3s a naipromot a SPO1; 39 SPO1s a naipromot a SPO2, 124 SPO2s a naipromot a SPO3, ken 43 SPO3s a naipromot a SPO4.

Kinuna ni Ticman a kaapiring ti nangatngato a ranggo ti dakdakkel a responsibilidad.

Inyunay-unay ni Ticman nga iti panagpangato ti ranggo ti maysa nga polis, kasapulan met a padur-asenna ti abilidadna a kas lider agsipud ta daytoy ti maysa kadagiti kangrunaan a panggep ti PNP Integrated Transformation Program, ti pannakatubay dagiti lider iti amin a level.

Kinarit pay ni Ticman dagiti adda iti babaenna nga itedda ti amin a kabaelanda, nalinteg ken nainkalintegan ti aramidda, ken ibaklayda iti pagrebbenganda a dedikado ken nainpropesionalan iti panangipakatda iti linteg.

Indagadag ni Ticman nga itultuloy dagiti naipromot nga ited ti dayaw iti PRO1 ken iti sibubukel a PNP.#

 

Comments are closed.