Footer

Agtulid dagiti ulo, depende iti resulta ti inbestigasion: UNP President

VIGAN CITY – Kinuna ti presidente ti nauraman nga unibersidad ditoy nga adda dagiti maikkat a guardia, depende iti resulta iti inbestigasion mainaig iti idadapo ti administration building ti pagadalan.

“Definitely, heads will roll,” kinuna ni Dr. Lauro Tacbas, presidente ti University of Northern Philippines idi madamag kenkuana no adda dagiti maikkat mainaig iti pannakauram ti administration building ti UNP.

Nupay kasta, kinuna ni Tacbas a depende iti resulta iti inbestigasion mainaig iti nasao nga uram.

Iti immuna nga interbio ti maysa a lokal nga estasion ti radio ken ni Dr. Gilbert Arce, impakaammona ti panangibilin ni Dr. Tacbas a maisayangkat  ti inbestigasion tapno maammuan no kasano a napasamak ti uram ken no apay a saan a dagus a naatipa ti apuy.

Mapapati a nangrugi ti uram iti ala una ti parbangon ti Pebrero 8 ngem nadaras a nagkayamkam ti apuy gapu ta daan a pasdek ken kayo ti dadduma a pasetna.

Kitkitaen dagiti otoridad no faulty wiring ti nakagapu iti uram.

Karaman kadagiti nagresponde a nangdepdep iti uram ti fire station ditoy siudad, JTC, Fortune Tobacco Redrying Plant, Magsingal, Sta. Catalina, Santa, Cabugao, Narvacan, Caoayan, Sta. Maria ken Candon City.

Impatalged ni Tacbas a nupay nauram dagiti rekord dagiti estudiante, ma-reconstruct dagitoy gapu ta adda sabali a rekord nga adda iti ikut dagiti nadumaduma a kolehio ti pagadalan.

Idi damo, naireport a nairaman a nauram dagiti sueldo dagiti mangisursuro a nakakabilen iti pay envelope ngem naammuan a nakalasatda nupay nabbasada.

Kasta met a saan a naan-ano ti mapapati a maysa a milion a kuarta a naidulin iti kaha iti opisina ti tesorero.

Mapattapatta nga aggatad iti P5 milion ti nadadael a pasdek ken dagiti nauram a rekord ken dadduma pay a ramramit ti opisina.

Kinuna ni Arce a kalpasan ti uram iti College of Arts and Sciences (CAS) idi Hulio 2008, nangiwayat ti BFP iti inspeksion kadagiti pasdek ti unibersidad ken gimmatangda kadagiti alikamen a maaramat no adda mapasamak nga uram.

Kinuna ni Tacbas a maysa a guardia ti naikkat gapu iti pannakauram ti CAS idi Hulio 2008.

Innayonna nga adda la ketdi manen guardia nga “agtulid nga uloda” no lumtuad iti inbestigasion a nagbaybay-ada iti pagrebbenganda iti pannakauram ti administration building.

Impatalged ni Tacbas a saan a maapektaran ti panagklase agsipud ta adda sabali a building nga akaran dagiti estudiante nga agbasbasa iti nauram nga administration building.#

Comments are closed.