Footer

Basketbolista ti Ilocos Sur Bravehearts, saanda a taga-Ilocos Sur

VIGAN CITY – Maymaysa laeng ti taga-Ilocos Sur kadagiti basketbolista a
mangbukbukel iti Ilocos Sur Bravehearts, basketball team ti gobierno
probinsial.

Ngem inkalintegan ni San Ildefonso Vice Mayor Tito Purisima, manager ti basketball team, a nagalada kadagiti players manipud kadagiti sabsabali a lugar tapno malitupan ti bilang dagiti players a mangbukel iti team gapu ta saan a disiplinado ken saan a nasayaat ti playing attitude dagiti basketbolista ditoy probinsia.

Nabuangay ti nasao a basketball team a mangibagi iti probinsia kadagiti paay-ayam ti Liga ng Pilipinas, gunglo a mangitandudo iti basketbol iti ruar ti Metro Manila.

Ngem iti roster ti nasao a team, ni laeng Christian Cabatu ti maibilang a taga-Ilocos Sur ta tubo ti Cabugao, Ilocos Sur ti amana ket naggapu aminen dagiti sabali pay a players iti ruar ti probinsia, kas iti Tarlac, Valenzuela, Quezon City, Bulacan, Manila, Laguna, Abra, Cavite, Pampanga,  ken Misamis Occidental.

Kinuna ni Purisima a nupay kayat ti coaching staff a taga-Ilocos Sur ti mangbukel iti team “agkurangda iti disiplina, ken madi ti attitudeda”.

“Diak koma kayat nga ibaga daytoy ngem kanayon met laengen a masaludsod no apay a saan a taga-Ilocos Sur dagiti mangbukel iti Ilocos Sur Bravehearts,” kinuna ni Purisima.

Kinuna pay ti bise mayor a saan pay a nadanon dagiti players ti Ilocos Sur ti “professional level” gapu iti nakurang a disiplina ken attitudeda.”

Ngem sakbay ti dialogo iti nagbaetan ni Gov. Deogracias Victor Savellano ken dagiti bokal, linagidaw ni Bise Gobernador Jeremias Singson ti kaadda ti basketball team ti probinsia nga agay-ayam iti Liga ng Pilipinas gapu iti kadakkel a magasgasto iti pannakamentenar ti nasao a team.

“Mano ti gasgastuen dayta basketball team a mapan makiliga iti all over the country,  million ti gasgastuennda,” kinuna ni Singson idinto nga inyunay-unayna nga “iti 15 players, maymaysa met wenno dudua ti taga-Ilocos Sur”.

Kinuna ti bise gobernador a million ti magasgasto dagiti basketball players agraman rah-rah boys kas iti panagluganda iti eroplano a mapan makiliga, board and lodging, hotel accommodation, kanen, sueldoda ken dadduma pay.

Segun ken ni Singson, kinuna pay ni Bokal Bunoan a “diak makita ti pagsayaatanna daytoy a programa”.

Innayon ti bise gobernador a nakuna pay ni Bunoan nga iti panagkitana, “saan a para sports program” ti nabukel a basketball team no di “para turismo” ngem saan met a “proper way” a programa ti turismo.#