Footer

INDAYON NI LAGIP: Kalbario ti panagtrabahok iti Syria (Tuloyna)

Idi nakadayoak, nagsardengak. Diak ammo ti pagturongak.  Inkeddengko nga  agturongak laengen iti imigrasion iti Syria.

Adu a Filipino ti nasangpetak ditoy, Manong Danny, dagiti padak a naparparigat nga OFW. Adu kadakuada ti pisikal a namaltrato.

Ngem idi makasangpetak iti imigrasion ket imbagak a naglibasak,  pinosasandak, sadak imbalud iti rehas. 

Wen, Manong Danny, napadasak ti naposasan, naibalud ken naibartolani ditoy Kaparsuci Jail iti Syria a pulos, diak napanunot a mapadasak amin dagitoy.  Saannak met a kriminal tapno ibartolinadak. Saannak met a dakes a tao tapno posasandak. 

Awan met ketdi pagkunaak iti panangtrato kadakami dagiti pulis nga agbanbantay ditoy, agsipud ta nasingpetda met.  Ngem naingpis a tinapay laeng ti kankanenmi ditoy. 

Kalpasan ti sumagmamano nga aldaw, pinaayabandak iti imigrasion.  Dita a nakasangok ti agency a nangiserrek kaniak ditoy.

Dinamagda no kayatko ti agtrabaho iti sabali nga amo.  Ngem imbagak a diak kayaten, Manong. Uray kasano panangipapilitda nga agtrabahoak pay ditoy, impettengko a diak kayaten.

Pammaliiwko, kasla ilakonak ti agency iti sabali nga employer tapno adda latta panguartaanda.

Kayatko met ti mangged ngem kasanon no nauyong ken saan a makatao manen ti agbalin nga amok, di siakto manen ti maparigatan?  Saan a natalged ti riknak nga agtrabaho manen iti sabali nga amo isu a kaykayatko laengen ti mabalud.

Dakdakkel ti gundawayko a makaawid no saannakon nga agsubli nga agtrabaho. Kas napaliiwko, naigatangan dagiti padak nga OFW a naglibas kadagiti amoda iti tiket kalpasan iti sumagmamano a bulan a panagtalinaedda iti embahada. Nakunak iti nakemko nga anusak laengen ti aguray iti embahada ngem iti agsubli nga agtrabaho iti no sinota nga amo a diak met kapkapnekan ti ugali ken panagpampanunotna. No adda la ketdin tiketmi manipud iti gobiernotayo, makaawidkamin.

Ngem ti diak ammo, Manong Danny, adda gayam nakaibaga ditoy Filipinas a nakabaludak ti Kaparsuci jail. Napan nagpatulong ti kabsatko ken pamiliak agraman ti kapitana ti barangaymi a San Agustin  ken ni sigud Congresswoman Grace Singson tapno makaawidak.

Naammuak a timmawag ni  Ma’am Grace iti opisina ni Senador Villar tapno tulongandak.  Insigidada met nga immaksion, Manong.

Di mabayag, pinaayabandak  dagiti taga-embahada ket imbagada a makaawidakon ta addan tiketko.

Idi Oktubre 15, 2008 a simmangpetak ditoy Filipinas.  Awan pulos kuartak a nagawid, Manong Danny, malaksid iti tiket ken bassit a kawesko.  Wen, nagawidak a saan a kas kadagiti kailiak nga OFW nga adda awitda a pasalubong a tsokolate, bado, pantalon, sapatos, ken dadduma pay kadagiti annak ken pamiliada.  Ima-imaak a nagawid.

Tallo nga aldaw pay a nagtalinaedak iti opisina iti OWWA.  Ditoy a nagur-urayak iti mangsundo kaniak tapno makaawidak iti balay.

Anian a ragsakko, Manong Danny, idi maarakupko met laengen dagiti annakko. Saanda a nagbirok iti pasarabo ngem umdasen kadakuada  a nakaawidak a sibibiag iti dennada.

Daytoy ti pakasaritaan iti biagko, Manong Danny.  Agbalin koma a pagulidanan kadagiti kalugarak nga agpangpangggep a mapan agtrabaho iti sabali a pagilian.

Kamaudiannana, kayatko a pagyamanan da sigud a Congresswoman Grace Singson iti panangtulongna kaniak tapno makaawid agraman ti bassit a puonan nga impaayna kaniak,  ken ni Senator Manny Villar, ken ni Kapitana Baby Garcia a no di gapu kadakuada, mabalin nga addaak pay la nga agsagsagaba iti Syria.


     Toy pagayammo


     Jean iti Candon City