Footer

KOMENTARIO: Dagiti biktima iti panagabuso iti kalintegan kas tao

Innayon ti CBCP: Dakkel a pannakalabsing ti kalintegan kas tao ti pannakapadisi dagiti mannalon ken trabahador iti talon gapu iti industrialisasion ken land conversion, komersial a panagkalap a pakadadaelan dagiti babassit a mangngalap ken iresponsable a panagreport ti media.

Maysa a kangrunaan a pammabalaw ti Simbaan ti saan pay a naresolbar a panagabuso iti kalintegan kas tao dagiti naisayangkat bayat ti Martial Law.

Ibilang ti Simbaan a ti panawen ti Martial Law ti kadaksan gapu kadagiti puersado a pannakatiliw ken pannakakulong iti pagbaludan, pannakapapatay ken pannakaparparigat dagiti lay leaders, church workers, ministro ken agiwarwarnak.

Ti saludsod: kalpasan ti tallupulo ket innem a tawen manipud idi naipasdek ti Martial Law, adda kadin nangato nga opisial wenno agtuturay a naikursong iti pagbaludan gapu iti panagabusoda iti human rights?

Iwarastayo dagiti matatayo: ania ti mapaliiwtayo? Kaaduanna kadagiti agtuturay idi ti adda met laeng iti koridor ti turay.

Isu met la a rupa, sabali laeng a posision.

Dagiti biktima idi? Biktimada pay la a mangiruprupir iti nalabsing a kalinteganda!

Ibilang ti Simbaan a pannakalabsing ti kalintegan ti tao no agtultuloy lattan a napanglaw ti maysa a tao iti baet ti panangikarigatanna a lumung-aw ti panagbiagna.

Ngamin, uray kasano ti panangigubetna iti bagina tapno dumur-as ngem adda met dagiti lapped tapno magun-odna ti tarigagayna.

Kas koma ti saan a panangipalubos dagiti landlord a makipagtagikua dagiti katalonanda iti daga a suksukayenda, ti nangina a singirenna iti utangen ti mannalon a maigatang iti abuno ken pestisidio ken dadduma pay a kasapulan iti kataltalonan a pakailumloman daytoy ket agtalinaed a nakakawar iti amona.

Ngem ibilang ti Simbaan a kadakkelan a human rights violator ti gobierno gapu iti mapapati a saanna a panangitaltalek iti pannakarabngis ti kalintegan dagiti umili.

Kas koma iti mapapati a dina panangipatungpal iti pudpudno a reporma ti daga, ti dumakdakkel a giwang ti panagbiag ti napanglaw ken nabaknang gapu iti panagbaybay-a ken panangpabpaborna kadagitoy nga agtungpal iti pannakairurumen dagiti babassit.

Adu pay dagiti pannakarabngis dagiti kalintegan ti tao ket saan a malaon daytoy a kolum. Ngem ti saludsod, iti uneg ti 50 a tawen, adda kadin simmayaatan ti pannakatratar dagiti napanglaw?

Saanen a masapul a sungbatan dayta ta nalawag a maimutektekan dagiti dua a bukel ti mata – no saan a bulsek ken nakakidem!#

Comments are closed.