Footer

PDEA agent, anakna, napapatay

CANDON CITY –  Napapatay ti maysa nga ahente ti Philippine Drug
Enforcement Agency (PDEA) ken ti anakna bayat ti panangrabiida iti
sardam ti Pebrero 12 iti pagtaenganda iti Barangay Darapidap ditoy a
siudad.

Saanen a naidanon iti ospital ti biag da Edward Gautani, Sr., 40, PDEA agent,  ken Edward, Jr., 16,  baro, high school school, gapu kadagiti linak-amda a sugat.

Napasamak ti pammaltog  iti agarup alas 7:10 ti sardam itay Huebes bayat a mangmangan dagiti agama iti resort-balayda iti Barangay Darapidap ditoy a siudad.

Iti inisial nga inbestigasion dagiti polis, mangmangan dagiti biktima idi simrek ti dua nga armado a tattao ket pinaltoganda ti laklakay a Gautani.

Mapapati nga iti baet dagiti sugatna, pinadas ti Gautani, Sr. ti tumaray ket inarayat ti anakna ngem insaruno dagiti lallaki a pinaltogan ti baro.

Nagsagrap ni Gautani, Sr., iti sugat iti nadumaduma a paset ti bagina manipud iti caliber .45 ken caliber .9 mm pistol. Nasugatan met ni Gautani, Jr., iti sugat iti ulo.

Nakarekobre dagiti polis iti nakapasamakan ti krimen iti 6 a kapsula manipud iti cal. 45, maysa a bala ti cal. 45, 4 a napitpit a buli ti cal. 45 ken 2 a kapsula ti .9mm.

Kitkitaen dagiti autoridad no adda pakainaigan ti pammapatay iti trabaho ti PDEA agent.

Segun ken ni Senior Supt. Virgilio Fabros, Ilocos Sur provincial director, aktibo ni Gautani iti anti-drug operations iti Candon City ken saksi iti nadumaduma a kaso ti droga.#