Footer

SARITA: Kulibangbang (Tuloyna)

NANGLUKOT ti gemgem ni Ama Nauro idi mailasinna ni Basao a sumungsungad.

Nakabitibit daytoy kadagiti agduduma a bunga ti kayo. Napayaman itay bigat ta ti ammona, pumanawen ngem ita, nagsubli ket kasla awan ti planona nga aggawid.

“Sisiimennakam’ sa? Amangan no napan nangayab iti kakaduana!”

Nagkullayaw la ‘garud ti barukong ni Ama Nauro. Kasla naapradan iti bara manipud iti sang-aw ti taaw.

Nagkulagtit ta inipit ti kappi ti tangan ti kannigid a sakana. Tinukkolna ti sipit daytoy ket impalladawna iti kadanuman. Agkakaribuson iti ayan ni Basao a sumungsungad. Kinitana ti ummong. Igawgawid ni Amaya ni Dayo a nakalayat ti gemgemna iti bagi ni Basao. Agir-irriag ni Dayo. Rimmaman pati dagiti gagayyem ni Dayo. Pinalawlawanda ni Basao ket iti ania man a kanito sigurado a maramananna  ti pungtotda.

“Agtalnakayo!” kinuna ni Ama Nauro idinto nga immasideg. Binugkawanna da Dayo. Kasla aso da Dayo ken dagiti kakaduana a  nangikawikaw iti ipusda sada sidudumog a pimmanaw a dida naipapas ti luksawda.

“Ganggannaet, apay nga addaka pay ditoy?” uray ammon ti lakay ti nagan ni Basao ngem ganggannaet latta ti awagna kenkuana. Ad-adda a nagsimron ti lakay idi awan ti maurayna a sungbat. Kellaat a nagdisso ti gemgemna iti rupa ni Basao.

“Sige, Ama, ipapasyo ti gurayo bareng mapaglunitna ti sugat a gapuanan dagiti padak nga Ilokano,” kinuna ni Basao.

“Kustonan, Ama,”inggawid ni Amaya ti amana.  Agtigtigerger dagiti laslasag ni Amaya. Itana laeng a makita ni Ama Nauro a kastoy. Kasla agpagunggan nga alingo.

“Pangngaasiyo, ikkandak laeng iti umanay nga aldaw nga agtalinaed ditoy. Papissaek laeng daytoy naalak.” Impakita ni Basao ti nakasiled iti kuadrado a pagikkan. Linuktanna ket impasiripna kadakuada ti nakabalkot.

“Awan bibiangko kadayta, ganggannaet! Ti napateg, agawidkan.”

“Pangngaasiyo kadi, as-asideg nga amang ditoy ayanyo ngem ti pagawidak. Kayatko nga adalen a nasayaat ti lugarda, ken no ania ti kabibiag dagitoy a kulibangbang. Ditoyko laeng a nakita daytoy a puli ket no iyawidko daytoy, amangan ta matay a dagus. Saan ngamin a maiyannatop iti sabali a lugar, ta dagiti parsua, adda bukod a lugar a paggargarawanda. Ditoy ti pangal-alaanda iti pagbiagda, iti kanenda tapno malasat ti pulida ti pannakaungaw.”

“DIAM isuro kadakuada ti pagsasaom, tiktikawem laeng ti panunot ken pammatida,” nakidallawat ni Ama Nauro iti saritaan da Basao, Amaya ken ti lima nga ubbing a nakadalupisak iti karuotan iti tuktok ti gukayab. Isursuro ngamin ida ni Basao iti panagbilangan babaen ti panangiyulog ni Amaya iti pagsasaoda. Binaon itay ni Basao ida nga agtuklap iti tirem kadagiti singngat ti tangrib. Daytoy ti bilbilangenda ita. No sinno ti kaadduan, isu ti isuro ni Basao iti sinnuratan iti napinas a kadaratan.

No kasano ti kinalinak ti danum ita a bigbigat ken  kinaderosas ti tangatang,  kabaliktadda ti rupa ti lakay.

Napasanud dagiti ubbing a nakaimatang iti rupa ni Ama Nauro. Naglilinnumbada laengen a bimmaba ken nakikinnamat kadagiti dalluyon a mangsabsabuag kadagiti batbato.

Nagkinnita da Basao ken Amaya.

“Padpadasek laeng ida a bingayan iti adal a nasursurok. Bay-anyo ta diak balusingsingen ti pammatida ngem ketdi nayonak ti ammoda. Isu nga inayabak itay ni Amaya ta ammok a didak maawatan,”  kinuna ni Basao.

“Agbambannogka laeng. Aginlalaingkanto ket gamin. Ditoy ayanmi, dimi a kasapulan dayta. Mabiagnakami ti taaw ken bantay. Ken maysa, saan a karaman dayta ti iyaannugotko nga agtalinaedka biit ditoy ayanmi.” Pinidut ni Ama Nauro dagiti tirem a naiwara ket simmalog a napan iti kadilian. Impapapasna nga impasayag dagitoy iti danum sa napan iti kadaratan ket nagtadtadek a kunam no agsalsala a rikrikosenna ti temtem.

Napilitan ni Amaya nga immasideg iti lakay.

“Ni Ama ketdin, aya. Diam koma met ipawil ti sirib a mabalin a maalada, agingga a naganus ti panunotda. Tapno dida maitulad kadakami a naiyimutan iti gundaway.”

“Diam idagullit dayta ta diak nagbasolan ti basol ti sabali.”

“Su ‘garud, Ama,” panangipapilit ni Amaya.

Kinusilapan ti ama ti anakna. Timmallikud ket nagsublin iti purok.

“Nagrigaten a palawagan ti lakay, aya,” naisennaay ni Amaya.

(Adda tuloyna)

Comments are closed.