Footer

910 marigrigat nga umili, nawarasan iti PhilHealth cards

Alilem, Ilocos Sur -Nasurok a siam a gasut a marigrigat a residente ditoy nga ili ti nawarasan iti PhilHealth card itay nabiit kas paset ti programa ti salun-at ti pannakabagi ti second district ti probinsia iti Kamara.

Imbagian ni Dr. Ericson Singson ni Deputy House Speaker Eric Singson iti pannakaiwaras dagiti 910 PhilHealth cards babaen ti panangbayabay dagiti municipal officials nga indauluan ni Mayor Onofre Bangaoil.

“Ti salun-at ti maysa kadgiti napateg nga ikkantayo iti importansia ta no nasalun-at ti bagi, nasalun-at ti ili,” kinuna ni Dr. Singson bayat ti simple a programa a naangay iti gymnasium iti daytoy nga ili.

Sakbay daytoy, naiwaras dagiti PhilHealth cards iti ili ti Cervantes, Gregorio Del Pilar, Sugpon ken dadduma pay nga upland municipalities.

Nagbubuligan da Cong. Singson, ti gobierno probinsial, ken ti municipal government ti pondo a pagbayad iti PhilHealth insurance dagiti benepisario nga indigent a residente ditoy nga ili.

Impakaammo ni Bangaoil nga addanto pay 500 nga umili a maikkan iti PhilHealth cards nga agtaudton iti pondo ni Dip. Singson.

Kabayatanna, naammuan iti mayor a masukatan iti baro a pasdek ti daanen a municipal building.

Kinuna ni Bangaoil a naggapu ti pondo manipud iti P2 milion a savings ken iti bingay ti munisipio manipud iti R. A. 7171.

“Inkari ni Congressman Singson a tumulong tapno maileppas daytoy a balay ti ili,” kinuna ni Bangaoil.

Naiyalis pay laeng dagiti empleado nga agop-opisina iti daan a munisipio iti senior citizen building, multi-purpose hall ken iti municipal hall annex.

Mapattapatta nga umabot iti P10 milion ti mabusbos iti pannakapabaro ti municipal building.#

Comments are closed.