Footer

INDAYON NI LAGIP: Ti Binangonko a Pamilia (Umuna a paset)

Dear Manong Danny;

Sapay koma ta addaka iti nasayaat a kasasaad a sangbayan ti suratko.

Awagannak laeng iti Domeng, maysa nga ama nga agnanaed iti Candon City, Ilocos Sur. Wen, tallo ti anakko a pasig a babbai: ni Maricar, Josephine ken Joy. Awaganta iti Cely ti asawak.

Manong Danny, saankamin nga agdendenna iti asawak. Ni laeng Josephine, ti maikadua nga anakmi ti kaduak iti nanumo a pagtaenganmi.

Damagko nga addaanen iti sabali a kabbalay ti asawak. Diak sigurado ta addaak iti Candon idinto nga adda idiay Tarlac. Manipud idi nagsinakami, awanen a pulos ti komunikasionmi.

Naragsak idi ti pamiliak, Manong Danny. Nupay maysaak laeng nga agpaspasada iti traysikel, mangankami met iti inaldaw a di aglangan, ken kangrunaan iti amin, maigatangak met dagiti ubbingmi iti kasapulanda.

Simple laeng ti biagmi, Manong Danny. Arapaapko a makapagbasa koma dagitoy ubbingko tapno isudanto ti sanggirmi iti panaglakay ken panagbaketmi.

Ngem agsipud ta basssit ti mateggedak iti panagpasadak, adda dagiti gundaway a diak magatang dagiti dadduma a kasapulanmi, nangruna iti asawak. Kas koma dagiti kalikagumna a bado wenno sapatos wenno alikamen iti balay.

“Gumatangta mammet iti radio-cassette, lakay!” nakuna ni Cely iti naminsan.

“Wen, no adda nawadwad a mapasadaak,” inkarik. Ngem saanko a natungpal ti karik ta uray kasano panangigaedko ti agpasada, bassit ti matgedak. Adu ngaminen ti traysikel iti lugarmi.

Wen, adda dagiti karik a diak natungpal. A pamrayan ni baket nga agpunto. Kunak no bassit la a banag dagidiay a nalaka laeng a mapagsaritaanmi nga agassawa. Ngem dimmakkel a kasla uram a nangdadael iti naurnos a panaglalangenmi.

“Kanayon la nga awanen, Doming, maumaakon. Diakon maanusan ti kastoy,” imparupana kaniak.

“Ania ket ni baketen, ammom met a bassit ti mapaspasadaan ita, aganusta, a,” insungbatko.

“Kaanonto, inton angged? Ayna, no agtalinaedta a kastoy, matayta a nakamulagat. Baket ken lakaytanton, kastoy latta ti panagbiagta… “

“Makitam met ti panagagawak, tapno adda pagbiagtayo. Tulongannak koma ketdi babaen ti panaglakolakom tapno isu pay a masapulanta.”

“Ania, paglakuennak? Inasawanak kadi tapno parigatennak? ” inmulagat ni Cely.

Saannakon a nagtimek, Manong Danny, tapno saan a dumakkel ti dimi panagkinnaawatan. Bagik lattan ti nagpakumbaba. Lumamiisto met la ti ulona, nakunak iti nakemko.

Ngem iti bumaybayag, kumarkaro met ti panagapami. Maysa a rabii, nagapakami manen. Nagpaulo ti pungtotko ket nasipatko.

Idi maalak ti natalinaay a panunotko, nagpakawanak iti asawak. Ngem imper-akna nga agsinakamin.

Inggawidko, Manong Danny. Kasapulandaka dagiti annakta, nakunak.

Ngem saanen a mabalusingsing ti pangngeddengna nga agsinakamin. Nauma kanon iti rigat… agsublin iti yan dagiti dadakkelna…

(Adda tuloyna)

Comments are closed.