Footer

Ramramit-talon, livelihood projects, naiwaras iti KABSAT outreach program

SAN ESTEBAN, Ilocos Sur – Nadumaduma a ramit-talon ken livelihood projects ti naiwaras kadagiti barangay ditoy bayat ti KABSAT Caravan nga insayangkat ti gobierno probinsial iti panangidaulo ni Gov. Deogracias Victor Savellano a naangay itay Pebrero 18 ditoy.

Kinuna ni Mayor Chester Elaydo a kasapulan a saluadan dagiti bumarangay dagiti naiwaras a ramramit-talon ken proyekto a livelihood agsipud ta dagitoy dagiti kasapulanda iti lugarda a naidatag ken ni Gov. Deogracias Victor Savellano a maited bayat ti nasao nga outreach program ti gobierno probinsial iti daytoy nga ili.

Kinuna ni Elaydo nga adda pay dagiti di naited a kiddaw dagiti opisial dagiti barangay ngem impanamnama ti gobernador a maited dagitoy apaman a sumangpet ti pondo manipud iti R.A. 7171.

Impatalged met ni Vice Mayor Mildred Elaydo a mamonitor a naimbag dagiti naiwaras a ramramit iti talon ken livelihood projects para iti naannayas a pannakamaneharda tapno adda kanayonan a pamastrekan dagiti lumugar.

Mismo a dagiti barangay officials ti immawat kadagiti ramramit-talon ken para livelihood.

Dagiti sumaganad dagiti naiwaras kadagiti barangay ditoy:

Tallo a hybrid a kalding ti naiwaras iti Barangay Ansad, Bateria ken San Nicolas.

Ni ABC President Rey Elaydo Jr. ti immawat iti kalding a para iti San Nicolas.

Nakaawat iti saggatlo a rolio a hose ti San Nicolas ken Bateria idinto a saglilima a rolio a hose ti naited iti Cabaroan ken Ansad.

Inawat da Barangay Captain Helen Eleccion ti Cabaroan ken dagiti kagawadna ti maysa nga electric pump a five horse power idinto a saggaysa a diesel water pump ti inawat ti Bateria, San Nicolas, Apatot, San Pablo ken Villa Quirino. Maysa a gasoline water pump ti naited iti San Rafael ket inawat daytoy ni Brgy. Capt. Arrieta Edralin.

Adda pay naiwaras a fish nets iti San Pablo ken Apatot, dua a coastal barangays daytoy nga ili.

Saggaysa a makina a pagpusi ti mais a naited iti Ansad ken Poblacion.

Naikkan pay iti saggaysa a kuliglig dagiti siam a barangay a pakairamanan ti Poblacion, Ansad, San Rafael, Bateria, Apatot, Cappa-cappa, San Pablo, Villa Quirino ken San Nicolas.#

Comments are closed.