Footer

SALAYSAY: 70 a tawen a nagsinsinnuratkami (Tuloyna)

Inyawis ni Pering ti ipapasiar da Bertha iti balayda iti Roxas sakbay nga agawidda.

“Oh, thank you. We’ll see if we have the time,” insungbat ni Bertha.

Adu pay a bambanag ti nagsasaritaanmi bayat ti kaadda da Pering, Othmar ken Mercedes iti otel. Sakbay a pimmanawda, imbaga ni Bertha ken ni Othmar a masapa nga agsubli iti kabigatanna ta sumurot nga agpa-Baguio. Masapul nga adda iti otel iti saan a naladladaw ngem alas 9 iti bigat.

Maikawaak iti klase ti kuarto a yanko. Nabayagko a naala ti turogko. Adu a bambanag ti immapay iti panunotko. Umapay ti panagbainko a mangawis kada Bertha iti balay gapu ta nanumo laeng a kalapaw.

Kabigatanna, February 13, nagpa-Baguiokamin. Nakilugankami ken Othmar iti tourist bus a nagluganan dagiti turista a pakairamanan da Mr. ken Mrs. Dehl.

“I know now why you only see Othmar once a year. Baguio is far from Manila,” kinuna ni Bertha idi asidegkamin iti Baguio.

“That’s true, my friend,” insungbatko. “The distance and my job prevent me from visiting him more often. So with Rose in Vigan,” innayonko.

Idi makadanonkami iti siudad ti Baguio, apanmi pinagtsek-in da Bertha idiay Mount Crest Hotel a kabarbaro pay idi a hotel iti siudad. Gapu ta kayatdan ti agpasiar uray sangsangpetda, inawisko ti dua a kamaestraak iti Quezon Hill Elementary School – da Mrs. Monsanto ken Miss De Vera – a kaduak a mangipasiar kadakuada.

Impasiarmi dagiti sangailik iti Burnham Park ken iti Lourdes Grotto. Gapu ta naladawen a malem, insublimi mi met laeng ida idiay otel.

Kabigatanna, February 14, inarkilak ti taksi ni kabsatmi iti pammati a Renato Trinidad, ket nagkuyogkami a dimmagas kada da Bertha ket impasiarmi ida iti nadumaduma a lugar iti Benguet. Immuna a napankami idiay Trinidad Capitol, iti yan dagiti nakadispley a Kabayan mummies, dagiti natural a napreserba a bangkay dagiti nagkauna a nagindeg iti Kabayan. Anian a siddaaw da Bertha idi makitada dagiti mummies ken maammuanda no kasano a napreserba dagiti bangkay.

Iti Benguet State University ti simmaruno a napananmi. Imbagak a ditoy ti immuna a nagam-ammuanmi babaen ti surat ken babaen ti inisiatibo daydi Dios-ti-aluadna a Mrs. Aurora Patterson. Pinasiarmi dagiti silk production iti farm ti eskuelaan. Nakitami no kasano ti pannakawarwar dagiti silk cones nga agbalin a seda a panait.

Iti Easter School Weaving Room ti simmaruno a pinasiarmi. Nakitada ti kadaanan a wagas ti panagabel babaen ti pagablan. Naay-ayo da Bertha a gimmatang iti abel a tualia ken pagiparabawan iti paso agsipud iti kinabursida.

Pinasiarmi pay ti Mines View Park, Imelda Park (Botanical Garden itan), ken ti Baguio Museum. Dinaydayaw da Bertha dagiti napipintas a paintings iti museo.

Kalpasan ti panangaldawmi iti Solibao Restaurant iti Session Road, napankami idiay Camp John Hay. Napintas idi ti Camp John Hay ta adda pay laeng iti babaen ti panangimaton dagiti Amerikano.

Ditoykami a nagpaut bassit ta napintas dagiti mabuya. Adu pakalaglagipan a retrato da Bertha ditoy.

Gapu ta malemen, nagsublikami iti siudad. Nagtaruskami idiay Quezon Hill Elementary School a pangisursuruak. Masarakan ti eskuelaan iti asideg ti tapaw ti bantay. Ni pay laeng Mrs. Monsanto ti nadanonmi iti opisina gapu ta nasapa pay ket di pay nadismis dagiti klase. Inyam-ammok ti kamaestraak kada Bertha.

Kiniddawko ni Mrs. Monsanto a kaduami a mapan iti ngato ti eskuelaan a pangurayanmi iti pannakalpas ti klase dagiti ubbing. Iti tapaw, matannawagan ti dadduma a paset ti siudad iti bandana ti daya ken amianan. Matannawagan met ti probinsia ti La Union iti bandana iti laud.

Bimmabakami iti eskuela idi matimudmi a rimmuaren dagiti ubbing. Inyam-ammok da Bertha ken ni Mrs. Vergara a prinsipalmi ken amin dagiti kamaestraak. Naragsak dagiti kakaduak a nakiam-ammo kada Bertha ken David.

Diak ammo ngem adda met gayam insagana dagiti kamaestraak a merienda – siopao, suman, chiffon cake, coffee and milk, ken soft drinks.

Bayat ti panagmeriendami, insalaysayko no kasanokami a nagam-ammo. Insalaysayko met ti napasamak iti airport ken no kasanokami a nagkita iti umuna a gundaway iti Peninsula Hotel. Kasta unay ti katkatawa dagiti kakaduak iti padasmi a nakisinnarak ken ni Bertha.

Idi malpaskami a nagmerienda, simmalogkamin nga agturong idiay balay. Pinakiredko ti rikna ken panunotko. Apay ketdin nga ibainko ti bassit a balayko, nakunak iti nakemko.

“This is our home. It is very small but we love living in it. Now that all my children are through schooling, I pray that improvement will come next,” kinunak.

“I’m very sure of that,” insungbat ti gayyemko. Piniselna ti dakulapko sa immisem.

Kasla naikkat amin a panagaripapak a tagibabaen ni Bertha ti kinanumok. Nariknak ti kinaimpusuan dayta a balikasna.

(Adda tuloyna)

Comments are closed.