Footer

SALAYSAY: Rumungrungsot dagiti bagyo gapu iti panagbara ti lubong

Pagarigan laengen dagiti kabakiran. Adun ti nakalbo gapu iti awan sarday a panagpukan kadagiti kayo tapno pagtungo, aramiden a muebles, pagpatakder iti balay ken dadduma pay a kasapulan iti panagbiag.

Dagiti kayo ti “mangsul-oy” iti carbon dioxide a patauden dagiti mapuoran a bambanag. Naduktalan a 55% iti makunkuna a greenhouse gas iti tangatang ket buklen ti carbon dioxide. Adda 25% a ngimmatuan ti carbon dioxide no maidilig iti napalabas a 200 a tawen.

Sabali laeng ti chloroflourocarbon (CFC), methane ken nitrous oxide. Agtaud dagitoy iti singaw dagiti kemikal, refrigerator, aircon ken dadduma pay a ramit a pangpalamiis iti pagtaengan wenno dadduma pay a pasdek; dagiti asuk nga agtaud kadagiti nadumaduma a paktoria; asuk manipud kadagiti nadumaduma a kita ti transportasion; ken singaw manipud kadagiti agruprupsa a banbanag.

Ti greenhouse gases buklen ti 24% a CFC, idinto a 6% met ti nitrous oxide.

No agtultuloy ti panagadu dagitoy a gases iti law-ang, agtultuloy met a bumara ti lubong ken rumungsot met dagiti bagyo, kuna ti Greenpeace.

Ania ngarud ti aramidentayo tapno malapdan ti panagbara ti lubong?

1. Panagaramat koma dagiti industrialisado a nasion iti salaknib kadagiti partuatenda a makinaria, ramit ken alikamen kas iti kotse, aircon, refrigerator, tapno bumassit ti asuk a parnuayenda nga isut’ mangted polusion iti tangatang.

2. Panagsardeng nga agaramat iti dinamita, sabidong ken kemikal iti panagkalap iti baybay tapno di mairamraman a matay dagiti babassit nga ikan ken pannakadadael dagiti koral a pagitlogan ken pagtaenganda.

3. Pananglapped iti pannakaabuso ti nakaparsuaan, kas iti panagtroso, panagminas ken panagibelleng kadagiti makasabidong a basura (toxic waste) kadagiti kabaybayan ken karayan.

4. Panagtitinnulong dagiti umili ken turayen a mangsaluad iti aglawlaw.

5. Panangited dagiti nababaknang a pagilian iti pinansial a tulongda para iti pannakaidur-as ti teknolohia a mangsaluad iti aglawlaw.

Yan ti rigatna, dagiti pay met ngarud industrialisado a nasnasion ti kangrunaan a pagtaudan dagiti rugit ti tangatang gapu kadagiti asuk dagiti paktoriada, luglugan, dagiti appliances ken dagiti dadduma a ramramit iti pagtaengan ken op-opisina kadagiti siudad ken urban areas.

No agtultuloy latta daytoy saan a napasnek a pannakalapped iti polusion ken pannakaiwayat dagiti addang ken tignay tapno maisardeng ti pannakaabusa ti nakaparsuaan, agpeggad daytoy a lubong iti pannakaungaw.

Maymaysa ti Daga a taengtayo. Rumbeng laeng a saluadan ken salaknibantayo iti peggad nga itden ti panagbara ti aglawlaw a mangted iti peggad kadatayo nga agindeg.#

Comments are closed.