Footer

EDITORIAL: Napintas iti papel, sabali ti implementasion

Itay nabiit, inangay ti gobierno probinsial ti maysa nga sports summit a dinar-ayan dagiti sports enthusiasts, coordinators, trainers ken coaches tapno maitag-ay ti kalidad ti sports iti probinsia.
Napapanawen daytoy nga inrusat ni Gov. Deogracias Victor Savellano agsipud iti kapaliiwan nga iti napalabas a tallo a tawen, makuna a saan a nabagas ti apit ti probinsia iti sports kas ipasimudaag ti nakiddit a medalia nga inyawid dagiti atletatayo iti pannakisalipda iti IRAA ken iti Palarong Pambansa.
Iti report ti division sports coordinator ti Department of Education ti Ilocos Sur, maysa a gold, 3 a silver ken 2 a bronze ti nagun-odan dagiti atleta ti Ilocos Sur iti pannakaisalipda iti Palarong Pambansa iti napalabas a tallo a tawen.
Iti pannakaisurat daytoy, madama ti paay-ayam iti IRAA iti Dagupan City. Segun iti report manipud iti dayta a siudad, awan iti umuna nga innem a puesto ti delegasion ti Ilocos Sur ken dagiti dua a siudad. Makuna manen nga eppes ti apit ti probinsia iti daytoy a pannakisalipna iti IRAA.
Napintas ti arapaap ni Gov. Savellano a pannakaitag-ay ti sports iti probinsia. Segun iti timetable, kalpasan ti summit, maisayangkat dagiti workshop dagiti coaches ken trainers, addanto pay maangay nga sports camp para kadagiti atleta tapno maisaganada iti pannakisalipda iti provincial meet ken iti IRAA ken iti Palarong Pambana.
Iti papel, napintas daytoy a programa. Ngem ti problema ditoy no masurot daytoy a programa. Ta saan a malibak nga adu dagiti nagpipintas a programa ngem saan a makapnek ti pagtungpalanda gapu iti kinakurang ti pondo.
Iti daytoy a programa, kasapulan dagiti baro a pasilidad a pagsanayan dagiti atleta. Kasano nga umasenso ti atleta a mangitag-ay iti kabaelanna no daan ken obsolete dagiti ramit ken pasilidad a pagsanayanna?
Kasapulan ti idadalan dagiti coaches ken trainers kadagiti workshop ken sports clinics tapno manayonan dagiti ammoda para iti pannakaidur-as ti kabaelan dagiti atleta.
Kasapulan dagiti atleta ti exposure kadagiti nadumaduma a pasalip tapno maaddaanda iti padas a makisalip kadagiti paay-ayam a mangitag-ay iti kabaelanda.
Kasapulan dagiti eksperto a mangkita iti year-round a panagsanay ken panag-training dagiti atleta babaen ti moderno ken sientipiko a wagas tapno ad-adda pay a maipangato ti talentoda.
Sumagmamano laeng dagitoy. Ngem agkasapulan dagitoy iti dakkel a pondo. Adda pagsasaotayo a saan nga agtaray ti lugan no awan ti gasolinana.
Ala, napintas ti panggep ni Gov. Savellano. Ngem iti kadakkel ti pondo a kasapulan para iti sports program ti probinsia, masaludsodtayo: maited kadi ti gobierno probinsial dagitoy a kasapulan para iti pannakaisagana dagiti atletatayo iti pannakisalipda iti rehional, nasional ken internasional a kumpetition iti sports?
Sabali ti programa a naikur-it iti papel, sabali ti implementasion dayta a programa tapno agballigi a saan a maisakripisio dagiti dadduma a prioridad a programa ti gobierno probinsial iti sanguanan ti global a krisis pinansial.#

Comments are closed.