Footer

INDAYON NI LAGIP: Ti Binangonko a Pamilia (Maikadua a paset)

Iti dayta a rabii, innala amin ni Cely dagiti gargaretna. Agsipud ta makitak a diak maigawiden, Manong Danny, imbagak nga ibatina ni Maricar ken ni Josephine.
“Mama, saannakami a panawan. Ditoyka lattan,” insangit ni Maricar. Kimpet iti gurong ti inana. Nagkulaidag met ni Josephine .
“Agsingsingpetkayo wen, uray awanakon ditoy, laglagipenyo nga ay-ayatenkayo. Adda la ngamin dagiti banag a rumbeng a tun-oyek, ket diak kabaelan a gaw-aten no addanak ditoy. Ngem uray inton kaano man, dikayonto malipatan. Ay-ayatenkayo ket agtalinaed dayta a panagayatko kadakayo,” kinuna ni baket sana inarakup iti nairut dagiti dua nga ubbingmi.
Ngem makatawen pay laeng ni Joy ket saan pay a napusot, isu a saanna a mabalin nga ibati. Ni ngarud Joy ti inkuyog ni baket iti ipapanawna.
Uray maysaak a lalaki, nagsangitak idi pumanaw ni Cely iti balay, Manong Danny.
Kasla nanglangeb ti langit. Kayatko ti aglaaw, kayatko nga iper-ak ti sakit a marikriknak ngem tineppelak ti bagik. Pudno met, marigrigatak nga awan ti mabalinko nga ipangas ken ni baket. Ay-ayatek ngem daytoy ayatko kenkuana, dina masupusopan ti panagbiagmi ken panagkasapulanmi.
Manong Danny, nabayag a diak nailiwliwag ti panagsinami nga aggasawa. Nabayag nga inem-emko ti saem a marikriknak. Ngem pinadasko a sardekan aniaman a pannakaupayko ken ni baket. Dagiti ketdi annakko ti nangpakulpa dagiti dakes a pampanunot a simngay kaniak iti daytoy a panagtalaw ni baket.
Wen, Manong Danny, manipud idin, siak ti nagbalin nga ina ken ama dagiti annakko. Ad-adda ngarud nga inggaedko ti nagpasada tapno mabiagko ida.
Ngem kalpasan ti panagturposda iti elementaria, pinagsardengko ida ta diak kabaelan nga isakad ti panagbasada iti high school. Bassit ti matgedak iti panagpasadak ket diak kabaelan nga ited dagiti kasapulanda iti eskuela.
Ubing pay ni Maricar ngem naawatanna ti kasasaadmi. Uray kasano a panangiparitko, nagbirok iti pagsapulanna tapno laeng makatulong kaniak ken ti adina. Simrek a katulong ti maysa a baket. Pagsiaatanna, naanus ti amona. Bassit ti sueldona ngem adda latta ipaiggemna kaniak tunggal bulan. Diak koma awaten ngem kinunana a para ken ni adingna. Kayatna nga agtuloy ni adingna nga agbasa uray makaturpos laeng iti high school.
Maysa nga aldaw, impalgakna a kayatna ti agtrabaho iti Manila. Adda kano naam-ammona a mangaw-awis kenkuana a kaduana a sumrek kas sales lady iti maysa a pagtagilakuan. Nangato kano ti sueldo ken libre pay ti paggiananda.
“Tang, para iti pagsayaatantayo daytoy. No makitak a napintas ti trabahok idiay, makatulongak a mangpabasa ken ni Josephine uray iti kolehio,” kinunana.
“Ngem madanagannak, nakkong, adu ti sulisog iti siudad. Amangan laeng no mairuboka.”
“Ania ket ni Tatangen, dinak pagdanagan. Ammok a dinak baybay-an ti Namarsua,” nakuna ni Maricar.
(Adda tuloyna)

Comments are closed.