Footer

Konsehal, di pabor a maikkan komendasion ti BFP Vigan

VIGAN CITY – “Trabahoda daydiay.”
Daytoy ti imbatad ni Konsehal Benjo Verzosa a pagtaktakderanna kas panangikalinteganna iti saanna nga ikakanunong iti pannakaited iti pammadayaw kadagiti bombero ti Bureau of Fire Protection ditoy siudad kas insingasing ti maysa a kabaddungalanna iti konseho ti siudad.
Kinuna ni Verzosa a trabaho dagiti kameng ti BFP ti pannakadepdep ti uram ket saan a kasapulan a maikkanda iti komendasion “for a job well done” ngem no koma adda “extraordinary a naaramid”, isu pay ti umuna a mangirekomenda iti komendasion wenno uray pay promosion dagiti bombero.
Inesponsoran da ABC Federated President John Patrick Singson ken SK Federated President Edreen Jeremiah Pajaro ti nasao a resolusion a maipaayan iti komendasion ti BFP Vigan, Candon City, Caoayan, Sta. Catalina, Magsingal, Narvacan ken Sta. Maria, pakairamanan ti pribado a sektor kas iti JTC Mall ken Northern Tobacco Redrying Corporation.
Kinuna ni Verzosa a saan pay a panawen a maikkan iti komendasion dagiti kameng ti BFP agsipud ta napan pay iti konseho ti maysa a kameng ti pamilia ti natay iti pannakauram ti FQ Store idi tumapog ti baro a tawen a nangibatadanna iti pammabalawna iti BFP gapu iti mapapati a naladaw a panagrespondena iti pannakadepdep ti uram.
Iti interbiona iti media, kinuna ni Vigan City Fire Marshall Floro Obrero a pagyamananna no maikkan iti komendasion ti BFP ken dagiti augmentation forces a naggapu iti kabangibang nga ili a nagresponde iti pannakadepdep iti uram.
“…No saan, awan met ti problema ta ti komendasion, kusa a maited…” kinuna ni Obrero.
Dimmapo ti tallo a kadsaaran a pasdek a nakaibalayan ti FQ Store ket nairaman a nauram ni Florencio Sy Que, 62, akinkukua iti pagtagilakuan, gapu iti ibebettak dagiti nakadispley a paputok a tagilako maigapu iti kuitis a mapapati a sinindian ti maysa a reveller kas panangsabatna iti isasangbay iti baro a tawen.
Nakasuan iti arson resulting to homicide ni Richard Pugal, 21, baro, residente iti Barangay Capangpangan gapu iti nasao nga insidente.
Kinuna ni Verzosa a duan ti napasamak nga uram iti Vigan ket no maikkan iti komendasion ti BFP mainaig iti uram idi Disiembre 31 “for a job well done”, ket no saan a maikkan iti komendasion ti BFP mainaig iti uram iti University of Northern Philippines , “kayatna a sawen, they have not done their job well?”
Ngem inkalintegan ni Konsehal Loreto Quibilan a rumbeng laeng a maikkan iti komendasion ti BFP ti siudad agsipud iti dagus a pannakadepdep ti apuy iti FQ Store ket saan a nakapagwaras ti uram kadagiti kaabayna nga establisimiento.
Kinuna ni Verzosa a saan met a naimut ti sangguniang panglunsod a mangted iti komendasion ngem innayonna a “saan pay a panawen” a maikkan iti komendasion ti BFP ti siudad.
Kinuna ni Verzosa a no adda maikkan iti komendasion, dagiti trabahador ti JTC nga agmasmasa iti tinapay a nagboluntario a bombero ti nasao a pagtagilakuan idi nagresponde ti firetruck daytoy iti uram iti FQ.
Naitantan ti pannakatratar ti nasao a resolusion iti sumuno a session ti konseho.#

Comments are closed.