Footer

SALAYSAY: Kannawidan Ylocos Festival: Burit ni Ilokano (Umuna a paset)

Adu dagiti maipagpannakkel a kultura ken tawid a kinabaknang a masarakan iti Ilocos Sur. Madlaw ngamin nga iti panaglabas ti panawen, mapukpukawen ti kaaduan a nakainsigudan nga ug-ugali, salsala, kankanta ken dadduma pay. Kaykayat metten dagiti ubbing ti agsala iti otso-otso ken no ania pay ditan a mabuybuyada iti telebision.
Daytoy ti kayat a preserbaren ti gobierno probinsial nga idauluan ni Gob. Deogracias Victor “DV” Savellano. Maysa ngarud a parambak a pakaitampokan dagitoy ti inrugi ti gobierno probinsial idi 2008. Naawagan daytoy iti Kannawidan Ylocos Festival a panangselebrar metten iti panagwaywayas ti Ilocos Sur kas naan-anay a probinsia. Maipalagip a naisina ti probinsia manipud iti Ilocos Norte iti amianan ken La Union iti abagatan idi Pebrero 2, 1818.
Narambakan ti maikadua a Kannawidan Ylocos Festival idi Enero 28-Pebrero 4 daytoy a tawen. Nairugi daytoy iti malem ti Enero 27 babaen ti misa konselebrada iti St. Paul Metropolitan Cathedral a sinaruno ti libut a nagrikus iti sentro ti siudad ti Vigan. Daytoy ti mangipakita iti kinatibker ti pammati ni Ilokano iti Namarsua Nailibut dagiti agduduma a patron ti ili a paset metten ti panagdaydayaw ken panagyaman dagiti agindeg iti adu a parabur a sagsagrapen ti probinsia.
Iti maikadua nga aldaw, nagdadarupdop dagiti adu a tao a pakairamanan dagiti ganggannaet a turista iti sanguanan ti provincial capitol ta agmalmalem a naipabuya dagiti nakaugalian a salsala ken kankanta babaen kadagiti ubbing nga agbasbasa iti elementaria ken sekundaria. Naggapu iti Ilocos Norte, Ilocos Sur, La Union ken Pangasinan dagiti nagpabuya nga estudiante.
Di inggingina dagiti tattao ti pudot ti panawen tapno laeng mabuyada dagiti naisangsangayan a kultura ti Ilocos Sur.
Iti daytoy met la nga aldaw ti pannakalukat ti trade fair a nakaiplastaran dagiti agduduma a produkto ken One Town One Product (OTOP) dagiti ili ti Ilocos Sur kasta metten dagiti naggapu pay iti Pangasinan, Benguet, Nueva Ecija, Nueva Viacaya ken dadduma pay a probinsia iti Amianan a Luzon ken Cordillera. Mairaman dita dagiti prutas, nateng, makan, produkto manipud iti kayo, lokal nga arak manipud iti agduduma a prutas, ken dadduma pay.
Nagsangpet pay itoy nga aldaw dagiti nateng a maisali iti “Pinaka-kontes” kas iti sangayarda a marunggay, kasla karamba a singkamas ken ube, tallo kadapan a tabungaw, maysa kadapan a bunga ti saba, nasurok dua kadapan a paltat, ken dadduma pay a naisalsalumina ti kadadakkelna a natnateng.
Lalo manen nga immadu ti tao iti malem a pannakaisayangkat ti umuna a paset ti “Awan Innatrasan” food eating contest. Linipat pay laeng dagiti simmali ti kolesterol bayat ti panaglantakda iti nalanit nga empanada ken longganisa tapno laeng maideklarada nga ari wenno reyna iti agduduma a kategoria. Saan met a mapulsot ti iriag dagiti nagbuya idi nairugi ti kinnaaduan iti mainum a basi. Pinagbalin ngamin dagiti simmali ti basi a kasla danum laeng ngem kaaduan ti naulaw kalpasan a naitumbada ti sangabote.
Naipakita met ti agduduma a talento iti Talugading ni Ilokano, ti lokal a bersion ti America’s Got Talent. Adda nagsala, nagkanta, nagjoggling, nagmagic ken dadduma pay.
Kas pangrikep a programa itoy nga aldaw, impabuya met dagiti sangpulo ket siam a kandidata ti Saniata ti Ilocos Sur ti talentoda iti talent night ti Saniata ti Ilocos Sur a nakapilian ni Elizabeth Naluz a kas Star of the Night.
Napno manen ti kapitolio iti tattao a kaaduanna ti agbirbirok iti trabaho ken mayat a mapan iti ballasiw-taaw iti maikatlo nga aldaw a pannakaisayangkat ti Jobs Fair. Itoy met laeng nga aldaw a naisayangkat ti “Sinniglatan”, pasalip iti painting/sketching ken ti on-the-spot craft demo competition.
Iti Quiz Bee competition(college level), inyalat ti University of Northern Philippines-College of Teacher Education ti umuna a puesto; University of Northern Philippines-College of Arts and Sciences ti maikadua ken St. Paul College of Ilocos Sur ti maikatlo.
Adtoy ti pakabuklan a resulta:

Quiz bee (High School): 1st – Ilocos Sur National High School (Vigan City); 2nd – San Juan National High school- (San Juan); 3rd – Naglaoa-an National High School (Sto. Domingo)

On the Spot Painting (College): 1st – Jeminic Real, University of Northern Philippines; 2nd – Benedict Arquero, University of Northern Philippines; 3rd – Joseph Tabbuac, University of Northern Philippines

On the Spot Painting (High School Level)
1st-Mitessa Inah Reynante, University of Northern Philippines-Laboratory School
2nd-Patrick Kyle Bermudez, Teodoro Hernaez National High School
3rd-Valiant Alonzo, Bantay National High School

On the spot Photography (College): 1st – Efren Carpio, University of Northern Philippines; 2nd – Loraine Gae Rivada, St. Paul College of Ilocos Sur; 3rd – Aiza Alegre, University of Northern Philippines

On the Spot Photography (High School): 1st – Kyle Wyatt Favis, St. Paul College of Ilocos Sur; 2nd – Arnold Torres, San Juan National High School; 3rd – Novie Jane Pagador, Naglaoa-an National High School

Poem Writing (College): 1st – Myrielle King Venus, St. Paul College of Ilocos Sur; 2nd – Elren Venice Hufana, University of Northern Philippines; 3rd – Jinky Tabigne, Macro College Inc.

Poem Writing (High School): 1st – Nomar Presto-Bantay National High School; 2nd – John Rowelle Palafox, Vigan National High School East; 3rd – Mark Christopher Molina, Lussoc National High School
Iti maikapat nga aldaw, naray-aw dagiti tattao kadagiti agsangagasut a babbaket ken kallakay a nagtataray para iti Senior Citizen Fun Run. Mangipakita daytoy nga ik-ikkan importansia ti gobierno probinsial dagiti nataengan ket adda met napateg nga akemda iti kagimongan.
Naisaruno met kalpasanna ti salip dagiti marching bands. Ditoy nga impakita dagiti elementary ken high school students ti laingda iti panagtokar iti instrumento kas iti lyre, drums ken dadduma pay.
Nairugi met iti Quirino stadium ti maysa nga airsoft competition a nagsasalipan dagiti agduduma a grupo dagiti umaayam itoy baro nga sports a sumiksikat metten iti probinsia. Malaksid kadagiti taga-Ilocos Sur, dimmayo pay dagiti grupo manipud kadagiti probinsia ti Rehion Uno ken Metro Manila.
Naangay pay itoy nga aldaw ti maysa a chess tournament. Nagkampeon ditoy ni Michael Perez (Laoag City); maikadua ni Rey Villalobos (Sta. Maria, Ilocos Sur) ken maikatlo ni Ronald Adaya ( Candon City). Napili met kas Top Lady ni Generose Razo (Candon City); Top Junior ni Patrick Dulay (Vigan City) ken Top Kiddie ni John Daniel Lemi (Vigan City).
(Adda tuloyna)

2 Responses to SALAYSAY: Kannawidan Ylocos Festival: Burit ni Ilokano (Umuna a paset)

  1. Francis Viloria March 3, 2009 at 8:30 am #

    Ti koma kangrunaan a masalakniban a maipannakkel ti probinsia aglalo ti Ciudad ti Vigan ket ti pannakaaramat, pannakaisayangkat ken pannakasalaknib ti pagsasao nga Ilocano.

  2. Salvador A. Espejo March 13, 2009 at 1:09 pm #

    Malaksid iti programa ti gobierno ti probinsia ken ti siudad ti Vigan a mangtaginayon kadagiti kadaanan a pagtaengan ditoy, adda met dagiti gannuatda iti kallabes a mangpreserba kadagiti sinurat ken gapuanan nga adda pakainaiganna iti kultura, pagsasao ken kannawidan ni Ilokano babaen ti cultural mapping, festivities ken pasalip iti panagsurat iti sarita ken salaysay iti Iloko, Bukanegan.
    Nupay kasta, bay-anyo ta idanonmi kadagiti agtuturay ditoy siudad daytoy a singasingyo.