Footer

SARITA: Kulibangbang (Maudi a paset)

Tinaluntonda ti desdes ti kaleddaan ken kapan-awan. Nalabsanda ti purok dagiti dadduma a pugot a nakasaad iti asideg ti burayok ti Tanglagan. Immun-unan a naiyawat kadagitoy ti sertipiko ti panagtagikuada iti pagsasaadanda ita a daga. Madamdama, sumarsaridan kadagiti nasasamek a kakaykaywan. Sumang-at-sumalogda ken limmasatda iti di mabilang a waig.
Addan iti lulonanda ti siray ti init idi malang-abda ti angin nga aggapu iti danum-apgad. Manipud iti rangkis a yanda, matannawaganen ti barukong ti taaw.
Intuloyda ti nagdaliasat idi madanonda ti Punta Bolos a nakisinaan dagiti agindeg a nakagiddananda. Intudo ni Basao kadagiti kakadduana ti kasla agtatapaw a puling a dildilamutan ti asul a danum. Di mailadawan ni Basao ti riknana, kas iti agiinnagaw a maris ti tangatang, bumalitok ken lumabbasit nga umasul a liningdan dagiti napirsaypirsay nga ulep iti lauden dagiti rumiet a bantay.
NAGSAKNAPEN ti sipnget idi makaballasiw da Basao ken dagiti kakadduana iti aplaya ti isla. Nagangtanen dagiti sinulbong iti agsumbangir nga iking ti wangawangan ti gukayab. Nagtaul a simmabat ti burboran nga aso idi maangotna ti kaaddada. Rimmuar dagiti ubbing a pugot agraman ni Dayo a nakarupanget ken dagiti padana a lallaki nga iggemda dagiti pikada. Binalangananda ti pagnaanda. Iti aniaman nga oras maiduyok kadakuada ti igamda. Nagpasango ni Basao.
Uray di maawatan da Basao ti sao da Dayo, umanayen ti langada ken bugkawdaa dida kayat ti idadap-awda iti lugarda. Simmalipengpeng dagiti kakaduana iti likudna.
Nagdardaras ni Amaya a nagpatnga.
“Amaya, ayan ni Ama Nauro?”
“Adda dita uneg ti gukayab. Isu ti bambantayanmi, tallo aldawen a naidalit gapu ta agtakki. Nagsasaruno met a simmina kadakami ti tallo nga ubbing.”
Nagbalangan da Dayo iti ruangan ti gukayab ngem kinapatang ni Amaya. Nagpaigid da Dayo.
Simrek da Basao iti uneg.
Intukod ni Ama Nauro takiagna tapno bumangon idi mapasungadanna ti grupo ni Basao.
“Ania manen a riribuk daytoy, ganggannaet? Didakam’ kadi pagtalnaen?” inkarigatan ti lakay a papigsaen ti timekna ngem ad-adda ketdi a kimmapsut ta kinelkel iti uyek.
“Amaya, itaraytay’ sadiay ospital ti amam. Nakapsut unayen ket kasapulanna ti maagasan a dagus.”
Inruar ti maysa a kadua ni Basao ti ulesna ket siniglotna a pinagsabet ti dua nga ungto daytoy. Napan met nangpidut ti maysa iti pungdol manipud kadagiti napempen a pangsungrod.
“Bay-andak ditoy, lallalo a matayak iti ar-aramidenyo,” kinuna ni Ama Nauro idi gandaten a bagkaten da Basao. Pati ni Dayo ket immingar ti bosesna sana tinimpag dagiti takiag ni Basao. Ngem kinasarita ni Amaya ida babaen ti pagsasaoda.
Tinaliaw ni Dayo ni Basao. Nagtung-ed ni Basao. Idi kuan, imbilin ni Dayo a bagkatenda ken assiwan ti lakay.
INYAWAT ni Basao ti papeles a napirmaan ken ni Ama Nauro. Binidingbiding laeng ti lakay daytoy. Nakabalesen iti pigsa ti lakay manipud iti panagsakitna. Segun kadagiti doktor, ti in-inumenda a danum nga addaan iti parasitiko ken ti naiwaras nga itlog ti lamok ti naggapuan ti sakitda, ket gapu ta lakaydan, al-alisto a kapten ti sakit ida. Pinattapatta dagiti doktor a mabalin met a ti danum nga in-inumenda ti impatay dagiti tallo nga ubbing.
“Dayta a papel ti pammaneknek a kukuayon ti isla ket awan ti karbengan ti siasinoman a mamagtalaw kadakayo,” kinuna ni Basao.
Miningmingan manen ni Ama Nauro dagiti nakakur-it iti sangkapirgis a papel. Ungapenna koma ti ngiwatna ngem dina ammo ti ibagana.
“Diak man mabasa daytoy adda iti papel ngem naragsakak. Addan pammaneknek ken kalasagmi iti panagtagikua iti isla, a saan a kas idi sadiay Dicamay. Mabainak la unay kadagiti impakpakitak idi kenka,” kinuna ni Ama Nauro.
“Tapno mapaneknekanyo ti kinadalus ti panggepko, suruandak ‘garud iti pagsasaoyo. Iti kastoy, mapagtalinaedtayo ti pulitayo a pugot. Kas kadagiti kulibangbang iti kakaykaywan a naikkan iti karbengan iti disso a paggianan, sadiay ti ayanyo, ket sadiay ti lugar a pakatungpalan dagiti arapaaptayo. Sumurotak iti panagsubliyo sadiay Maloncon.”
“Arapaaptayo? Apay nga iramanmo ti bagim? Ken apay a sumurotka?” nakuna ni Amaya.
Nakigtot ti balasang idi iggaman ti baro dagiti dakulapna. “Palubosandakami ken ni Amaya iti ayan-ayatmi,” kinuna ni Basao a nangtaliaw ken ni Ama Nauro.
“Saurka, dika pay nagarem. Nagalistokan! Ammom aya garud a kayatka?” nalag-an a kinidag ni Amaya ti sikigan ti baro.
“Inyarasaas daydi kulibangbang kaniak ti kiddawmo nga agsubliak iti ipapanawko,” kinuna ni Basao idinto a dina pinalusposan ti dakulap ti balasang.
Nagkatawa ni Ama Nauro. Nagparang la ket garud ti kabulkabulan a ngipenna. Kasla makitkitanan dagiti tumaud nga apokona nga agay-ayam iti puraw a kadaratan.#

Comments are closed.