Footer

Sports summit: tapno makaparnuay makabael nga umaayam

VIGAN CITY – Kinuna ni Gov. Deogracias Victor “DV” Savellano a napateg a maaddaan ti probinsia iti roadmap iti sports ken masapul nga adda naan-anay a training sakbay a sumango iti kompetision tapno pumasa iti national level.
Daytoy ti imbatad ni Savellano bayat ti sports summit nga inangay ti gobierno probinsial tapno mapasantak ti sports iti probinsia.
Ni Gerardo “Ral” Rosario, premiado a lumalangoy ti pagilian ken consultant ti Philippine Sports Commission ti kangrunaan a guest speaker iti nasao nga okasion nga inatenderan da Bokal Jose Bunoan, Jr, chairman ti committee on sports ti hunta probinsial, SK Federated Pres. Deogracias Jose Victorino Savellano, ken dagiti sports coordinators dagiti eskuelaan, coaches ken trainors ti agduduma nga sports.
Naipresentar bayat ti summit ti maysa a long term plan ti sports program ti probinsia tapno ngumato ti level ti sports iti Ilocos Sur.
“Saan nga umdas a nalaingtayon iti intertown competitions. Masapul a maisuro ti sientipiko a wagas ti panagay-ayam tapno maaddaantayo kadagiti makabael nga umaayam a makisalip iti international competitions,” kinuna ni Savellano.
Kinuna met Rosario a rumbeng a mangrugi ti sports iti grassroot level.
Innayonna a kasapulan ti panagkikinnammayet dagiti lokal a gobierno, gobierno probinsial, gobierno nasional, ken sports scientists tapno makadiskobre kadagiti nalalaing nga atleta.
“Saantayo koma nga agsardeng a dumawat iti suporta kadagiti maseknan para iti sports development. Kasapulantayo dagiti committed a tattao para iti panagballigi ti long term plan ti sports iti probinsia,” innayon pay ni Rosario.
Kabayatanna, naammuan a kumidkiddit ti medalia a nagun-od dagiti atleta ti Ilocos Sur iti napalabas a tallo a tawen kas maibasar iti report ni Physical Education and Sports Coordinator Meneleo Palma ti Department of Education ditoy probinsia.
Segun ken ni Palma, maysa a gold, 3 a silver ken 2 a bronze ti nagun-odan dagiti atleta ti Ilocos Sur iti pannakaisalipda iti Palarong Pambansa iti napalabas a tallo a tawen.
Iti PP idi 2006 a naangay iti Naga City, nagun-od ni Rio de la Cruz ti gold iti taekwondo (lightweight), secondary; Melba Gapate, silver iti high jump, elementary ken Joey Carlo Ordilla, bronze iti shot put, elementary.
Idi 2007 PP a naangay iti Koronadal City, South Cotabato, nagun-od ni Joseph Velasco ti silver iti high jump, elementary, ken Rose Jean Lodivico, bronze iti taekwondo (lightweight), elementary.
Iti PP idi napalabas a tawen a naangay iti Puerto Princesa City, Palawan, inyalat ni Bill Pordido ti silver iti high jump, elementary.#

Comments are closed.